Kryeministri i Kosovës, Albin Kurti ditën e sotme pas përurimit në Klinikën e Kardiokirurgjisë, është pyetur nga gazetarët edhe për vrasjen e Faton Hajrizit, shkruan Gazeta Online Reporteri.net.

Por, lidhur me rastin, Kryeministri Kurti s’deshi të prononcoj, duke thënë se janë ministritë përkatëse për këtë punë.

I pari i Qeverisë, tha se ai s’mund ta bëjë edhe punën e Ministrit, pasi siç deklaroi ka shumë punë si Kryeministër.

“Dy ministritë tona, e Punëve të Brendshme dhe të Drejtësisë e trajtojnë këtë rast. Nuk kam nevojë ta bëjë edhe punën e Ministrit, besoni kam shumë punë si Kryeministër”, tha Kurti para gazetarëve.

Ditën e djeshme, Ministria e Punëve të Jashtme dhe Diasporës, njoftoi se autoritetet serbe kanë dërguar shenjat e gishtërinjve të një personi, të cilat bashkë me shenjat e gishtërinjve të Hajrizit janë përcjellë në Agjencinë e Kosovës për Forenzikë.

Pas krahasimit, Drejtoria e Bashkëpunimit Ndërkombëtar Policor – ILECU ka pranuar përgjigje se këto gjurmë i përkasin Hajrizit.

“Lidhur me rastin e pretenduar nga ana e Serbisë të vrasjes së qytetarit të Kosovës në Serbi, informojmë opinionin publik që sapo jemi njoftuar nga Drejtoria e Bashkëpunimit Ndërkombëtar Policor – ILECU e Policisë së Kosovës se autoritetet serbe, më datë 22/07/2024, kanë dërguar shenjat e gishtërinjve të një personi dhe të njejtat shenja së bashku me shenjat e gishtërinjve të qytetarit të Kosovës, Faton Hajrizi, janë përcjellë në Agjencinë e Kosovës për Forenzikë, ku pas krahasimit nga AKF, ILECU ka pranuar përgjigje se këto gjurmë i përkasin qytetarit të raportuar si i vrarë, Faton Hajrizi”, thuhej në njoftimin e MPJD-së.

/Reporteri.net/