Vendi është në ndalim qarkullimi dhe masa ekstreme kundër përhapjes së koronavirusit, por kjo si ka penguar disa vlonjatë të dalin për plazh.

Policia e ushtria ka zbritur në rrugë dhe njerëzit janë këshilluar të mos dalin nga shtëpia.

Por temperaturat e larta i nxitën disa vlonjatë të shkelin këshillat për ndalim qarkullimi dhe të dalin në plazh.

Shumica vetëm për të marrë rrezet e diellit, por disa edhe për një zhytje në det.

“Për mua është zgjidhja më e mirë, nuk rrihet në shtëpi.”

“Ishte ujë i ftohtë, por varet si e ke stërvitur trupin.”

Pavarësisht se vetë kanë shkelur këshillat thonë se mbështesin masat ekstreme të qeverisë për të luftuar koronavirusin.

“Kjo është epidemi, individi do të marrë atë që e meriton. Mbase nuk na ngarkon zoti me të gjitha.”

Ndalimi i makinave thonë se duhet të kthehet në traditë, si një mënyrë që mund të të ndikojë edhe në uljen e ndotjes në qytetin bregdetar.

“Vlora pa makina është gjëja më e mirë për mua.”

Në Vlorë nuk ka asnjë rast të prekur nga koronavirusi, ndërsa në qytet masat parandaluese janë forcuar, por sërish ka qytetarë që po i neglizhojnë rekomandimet parandaluese./ora