Tentuan të korruptonin punonjësit e policisë kufitare, arrestohen

Policia e Rinasit njofton se brenda pak orësh ka ndaluar dy persona të cilët tentuan të korruptonin punonjësit e Policisë Kufitare, me qëllim lejimin për të udhëtuar drejt vendeve të BE-së edhe pse nuk plotësonin kushtet.


Kështu, në dy raste të ndryshme, janë vënë në pranga shtetasit A. M., 41 vjeç dhe Q. M., 56 vjeç të cilët i ofruan punonjësit të policisë përkatësisht 50 dhe 100 euro që t’i lejonte të kalonin.

Sipas policisë kufitare, këta shtetas nuk justifikonin qëllimin e lëvizjes dhe nuk plotësonin kushtet për të udhëtuar në hapësirën Schengen.

Policia Kufitare gjithashtu iu bën apel të gjithë shtetasve që duan të udhëtojnë drejt vendeve të BE-së, që në rast se nuk plotësojnë kushtet për të lëvizur në hapësirën Schengen të mos ndërmarrin asnjë veprim të kundërligjshëm, pasi do përballen me ligjin.