Nëna e Ronaldos, Dolores Aveiro ka treguar hollësi nga takimi i djalit të saj me Messin në ceremoninë e “Topi të Artë” të vitit 2017.

Ajo në një intervistë së fundi ka folur për Ronaldon dhe nipin e saj Cristiano Jr, shkruan Reporteri.net

Ajo e zbuloi se cili ishte reagimi i Cristiano Jr kur e kishte parë Messin dhe tha se në atë kohë nipi i saj ishte më i gjatë sesa ylli argjentinas i Paris Saint-Germain.

“Isha me Cristiano Jr dhe i thashë: ‘Shiko, ai është Messi.’ Ai m’u përgjigj: ‘Ky nuk është Messi, ky njeri qenka shumë i shkurtër’. Por biri im e nxiti atë dhe i tha të shkojë dhe ta përshëndetë Lionelin”, tha Aveiro.

Në kohën kur u takua me Messin, Cristiano Jr ishte vetëm 7-vjeçar.

“Nipi im ishte më i gjatë se Messi në atë kohë. Ishte një çast shumë qesharak”, shtoi ajo.

Nga ajo ceremoni, Ronaldo doli si fitues i Topit të Artë për herë të fundit.