Në Turqi po tranohen pas Muriqit: Luani kosovar tani vlen 100 milionë euro

Me supergolin e tij të shënuar në ndeshjen e sotshme të Fenerbahces, sulmuesi kosovar Vedat Muriqi ka qenë në qendër të vëmendjes të tifozëve dhe gazetarëve turq sërish sot. Ai mori lëvdata të mëdha për paraqitjet të deritanishme.


Që kur u transferua nga Rizespori në Fenerbahce gjatë afatit kalimtar të kësaj vere, Vedat Muriqi ka qenë ylli i Superligës turke, duke bërë që për të interesohen shumë klube të mëdha evropiane.

E përderisa shumë skautë të klubeve evropiane janë duke e monitoruar formën e tij, Muriqi po vazhdon të jetë mbresëlënës në ndeshjet e Kombëtares së Kosovës dhe të Fenerbahces.

Së fundi, ai ndihmoi në fitoren e Fenerbahces kundër Konyasporit me rezultat 5:1, duke e shënuar një gol mbresëlënës nga largësia në minutën e 82-të të ndeshjes. Pas këtij goli, lëvdatat për të online ishin të mëdha.

“Ne nuk mund të ishim në një hap me shpejtësinë e golave sot. Vedati e ka shënuar njërën ndër golat më të bukura që e kam parë ndonjëherë. Tifozët mund të mos duan të largohen nga stadiumi sot. Ndërkohë, Vedat Muriqi 100 milionë eurosh”, shkroi gazetari turk Sercan Hamzaoglu.

“Muriqi është sulmuesi më i mirë në ligë, kjo s’është as e debatueshme. Bisha kosovare”, shkroi Aaron E Armstrong.

“Vedat Muriqi ka shënuar në të gjitha ndeshjet që Fenerbahce i ka fituar në këtë sezon të Superligës (5 gola, 5 fitore). Ndikues”, shkroi @OptaCan.

“Vedat Muriqi është i madh. Ky lojtar është i jashtëzakonshëm, është i mrekullueshëm”, shkroi @TurcFootball.

Muriqi i ka ndihmuar Fenerbahces që pas nëntë ndeshjeve të para të radhitet në pozitën e dytë në tabelën e Superligës turke, me vetëm një pikë më pak se lideri, Alanyaspor. Ai ishte mbresëlënës edhe në ndeshjet e fundit të Kosovës, për të cilën i ka shënuar katër gola dhe i ka asistuar dy të tjera në ndeshjet kualifikuese për EURO 2020.