Futbollistët kosovarë po pushtojnë çdo ditë e më shumë ligat më të forta të Evropës.

Miris Hoti, talenti 19-vjeçar prizrenas, është emri më i ri i cili së shpejti pritet t’i bashkohet një skuadre të madhe nga Evropa, shkruan Reporteri.net

Hoti ka qenë pjesë e grupmoshave të Kukësit dhe Teutës, ndërsa ka djersitur edhe fanellën e skuadrës së Veleçikut, e cila bën pjesë në një rang më të ulët të garave në Shqipëri.

Ish-futbollisti i Kukësit dhe Teutës, prite të udhëtojë këto ditë për në prova tek gjiganti turk Fenerbahçe, aty ku pak minuta më parë u zyrtarizua si futbollist i ri i kësaj skuadreje edhe Vedat Muriqi.

Në një bisedë me Reporteri.net, Hoti ka treguar se përpos Fenerbahçes, do të ketë prova edhe në skuadrat e Serie A, tek ajo e Atalantas dhe Chievos.

Ai është shprehur mjaft entuziast për këto udhëtime dhe ka treguar se është stërvitur fort që prej lëndimit që e mbajti atë jashtë fushave për një kohë të gjatë. Ai beson se do të ketë sukses në këto prova dhe me shumë gjasë do të bëhet pjesë e njërës prej skuadrave të lartcekura.

Talenti prizrenas ka thënë për Reporteri.net se ka pasur edhe ftesa nga grupmoshat e Përfaqësueses së Kosovës dhe ajo e Shqipërisë, por për shkak të lëndimit që e kishte pësuar, nuk kishte mundur të grumbullohej.

Mirisi ka thënë se në të ardhmen do t’i mbrojë ngjyrat e Përfaqësueses së Kosovës, nëse veç ftohet nga Përzgjedhësi./Reporteri.net/