Mëngjesin e sotëm një person është arrestuar, nën dyshimin për përfshirje në veprat penale “tregti e ndaluar’ dhe ‘kontrabanda e mallrave”.

I arrestuari del të jetë Bajram Muhaxheri, vëlla terroristit të vrarë të ISIS-it, Lavdrim Muhaxheri, nga Kaçaniku.

Sipas njoftimit, hetuesit policorë nga Njësia Rajonale për Hetimin e Krimeve Ekonomike dhe Korrupsion (NjRHKEK) Ferizaj, kanë trajtuar një informatë për një person të dyshuar.

Policia njoftoi se në koordinim me prokurorinë, kanë kryer kontrolle në shtëpinë e të dyshuarit.

I arrestuari për policinë ka qenë edhe më parë i njohur për përfshirje në veprimtari penale.

Polica ka njoftuar se gjatë  kontrollit të shtëpisë, policia ka gjetur:

-161.485 (njëqind e gjashtëdhjetë e njëmijë e katërqind e tetëdhjetë e pesë) euro,
-2320 (dymijë e treqind e njëzet) franga zvicerane,
-2300 (dymijë e treqind) dollar amerikan,
-80.850 (tetëdhjetëmijë e tetëqind e pesëdhjetë) denar maqedonas,
-696 kilogram mjaltë (produkt i dyshimtë pa prejardhje),
-250 kilogram fasule (pa prejardhje),
-Një pushkë e gjatë (pushkë ajrore),
-Një revole,
-Një veturë dhe
-Një telefon.

“Për rastin me mallin e kontrabandë (mjalti dhe fasulja), është ftuar për trajtim njësia e Doganës së Kosovës.
Ndaj të dyshuarit është iniciuar rasti, nën dyshim për përfshirje në veprat penale: ‘tregti e ndaluar’ dhe ‘kontrabanda e mallrave’”, ka njoftuar Policia.

Pas intervistimit në prezencë të avokatit mbrojtës, me aktvendim nga prokurori kompetent, i dyshuari u dërgua në ndalim prej 48 orësh.