Prokurori i Prokurorisë Themeloren në Prishtinë në Departamentin për Krime të Rënda, Besnik Jakupi, lidhur me aksionin që po zhvillohet në pikat e laboratorit “Avicena”, tha se dyshojnë që certifikatat mjekësore për patentë shoferë janë lëshuar prej pikave që nuk kanë pasur licencë nga ky laborator.

“Po, me urdhëresë të gjykatës është. Unë e kam ba kërkesën, çertifikatat mjekësore për patentë shoferë janë lëshu prej pikave që nuk kanë pas licencë”, tha për “Betimi për Drejtësi” prokurori i rastit, Besnik Jakupi.

Gjithashtu, Jakupi tregoi se rasti ka të bëjë me veprat penale “Ushtrim i kundërligjshëm i kundërligjshëm i veprimtarisë farmaceutike” si dhe “Rastet e posaçme të falsifikimit”

Krimet Ekonomike aksion në pikat e laboratorit “Avicena”

I pyetur se a ka persona të ndaluar, prokurori tha se ende nuk është ndaluar asnjë person.

“Sot jemi duke e bërë vetëm urdhër-kontrollin. Jemi duke e zbatu, ende nuk kemi ardhur në atë pikë, për momentin jo”, tha Jakupi.

Aksionin në pikat e Avicenës e ka konfirmuar edhe Policia e Kosovës, por nuk kanë dhënë detaje. Në anën tjetër, Gjylferije Zabeli nga zyra për informim në Ministrinë e Shëndetësisë, tha se aksioni po zhvillohet me kërkesë të Krimeve Ekonomike.