Kandidati i AKR-së për deputet, parti e cila garon në listën e LDK-së, Jetlir Zyberaj ka treguar se bashkë me drejtues të tjerë të partisë kanë vizituar Teqen e Madhe në Rahovec.

“Pas takimeve me strukturat organizative të partisë, së bashku me Presidentin Pacolli vizituam Teqenë e madhe të Rahovecit dhe u takuam me Sheh Besimin. Teqeja e madhe në Rahovec nuk është vetëm një institucion fetar për popullatën lokale. Ishte thjesht streha e patriotëve që organizuan luftën për çlirim.

Për atë arsye, në vitin 1946 pas mbledhjes së patriotëve të NDSH në Teqe, u arrestua heroi i Kosovës Sheh Muhedin Shehu.”, ka shkruar ai.

Zyberaj ka thënë se Teqeja e madhe e Rahovecit shërbeu gjithashtu si një streh në luftën e fundit për liri, pavarësi dhe mobilizim të popullatës lokale në luftën kundër Serbisë.