Mediumi i njohur zviceran “Blick.ch” ka shkruar për zgjedhjet e jashtëzakonshme parlamentare që do të mbahen këtë të diele.

“Kosovarët votojnë me flamurin zviceran”, kështu titullohet artikulli i mediumit zviceran, shkruan Reporteri.net.

Në artikullin e mediumit zviceran shkruhet se në javën e fundit në drejtim të Kosovës janë nisur 28 fluturime dhe mbi 300 autobusë.

“28 fluturime dhe mbi 300 autobusë: Kosovarët që jetojnë në Zvicër aktualisht po udhëtojnë me grupe në vendlindjen e tyre për të votuar. Priten mbi 10,000 votues nga Zvicra”, thuhet në artikull.

Rreth 113,000 njerëz me shtetësi kosovare jetojnë në Zvicër. Sidoqoftë, numri i njerëzve që janë nga Kosova e që jetojnë në Zvicër është shumë më i madh.

Vlen të përmendet se rreth 250,000 e përmendin shqipen si gjuhën e tyre kryesore e shumica e tyre vijnë nga Kosova.

Kujtojmë se mbi 100 mijë mërgimtarë janë certifikuar nga KQZ për të votuar nëpërmjet postës.