Ministri i Punëve të Brendshme, Xhelal Sveçla ka bërë të ditur se tashmë janë identifikuar sulmuesit e gazetarit Valon Syla, shkruan Reporteri.net.
Përmes një postimi në Facebook, Ministri Sveçla ka thënë se kryesit e këtij akti shumë shpejt do të sillen para drejtësisë.
Sulmet e tilla sipas Sveçlës bëhen edhe më të papranueshme kur ndodhin ndaj gazetarëve, puna e të cilëve siç thotë Ministri janë të garantuara me legjislacion.
“Institucionet e sigurisë do të vazhdojnë angazhimin për garantimin dhe respektimin e të drejtave të çdo qytetari tonë të cilat janë të pacënueshme dhe të padiskutueshme”, ka shkruar mes tjerash Sveçla.
Postimi i plotë:
Sulmi ndaj kujtdo është vepër e rëndë ndërsa bëhet më i papranueshëm kur i drejtohet një gazetari, puna dhe liria e shprehjes të së cilit janë të garantuara me legjislacionin tonë dhe jo vetëm.
Si qytetar dhe si Ministër i Punëve të Brendshme natyrisht jam shqetësuar me sulmin e mbrëmshëm ndaj gazetarit Valon Syla. Si shoqëri dhe si pjesë e institucioneve angazhohemi për një shtet ku mbizotëron demokracia e ku mendimi ndryshe nuk ballafaqohet me sulm të çfarëdo lloj forme.
Pas hetimeve intenzive të Policisë së Kosovës tashmë janë identifikuar sulmuesit e gazetarit Syla dhe shumë shpejtë kryesit e këtij akti do të sillen para drejtësisë.
Institucionet e sigurisë do të vazhdojnë angazhimin për garantimin dhe respektimin e të drejtave të çdo qytetari tonë të cilat janë të pacënueshme dhe të padiskutueshme.
