Kryeministri i Kosovës, Albin Kurti sot gjatë ditës në Forumin Ekonomik në Davos të Zvicrës ku dhe po merr pjesë ka takuar homologun e tij kroat, Andrej Plenkoviq, shkruan Reporteri.net.

Në takim, dy kryeministrat folën rreth bashkëpunimit mes dy vendeve në fusha të ndryshme.

Kryeministri Kurti e falënderoi Plenkoviq për mbështetjen e vazhdueshme ndaj Kosovës, si dhe kontributin përmes rritjes së prezencës së saj brenda trupave të KFOR-it.

Komunikata e ZKM-së:

Në margjina të Forumit Ekonomik Botëror, takimi i radhës i Kryeministrit të Republikës së Kosovës, Albin Kurti, ishte së bashku me Kryeministrin e Kroacisë, Andrej Plenkoviq.

Zhvillimi ekonomik dhe stabiliteti institucional që ka njohur Kosova në tre vitet e fundit u diskutua në këtë takim e ku Kryeministri Kurti potencoi politikat e ndërmarra dhe rezultatet e arritura.

Palët vijuan bisedën rreth fuqizimit të bashkëpunimit mes shteteve tona, të fokusuar në fusha të ndryshme e me rëndësi madhore për ne siç është edhe ajo e arsimit.

Kryeministri Kurti e falënderoi Kryeministrin Plenkoviq për mbështetjen e vazhdueshme të tij dhe të Kroacisë ndaj sovranitetit, integritetit territorial dhe sigurisë së Republikës së Kosovës, e ku Kroacia edhe ka kontribuar përmes rritjes së prezencës së saj brenda trupave të KFOR-it.

U vlerësua lartësisht dhe përkrahja e vazhdueshme e Kroacisë për Kosovën sa i përket dhe anëtarësimit në organizata ndërkombëtare.