Bashkimi Evropian ka thënë se përfaqësuesja e lartë për politikë të jashtme dhe siguri, Kaja Kallas, është e gatshme të thërrasë një takim të nivelit të lartë ndërmjet Kosovës dhe Serbisë, por për këtë nevojitet vullnet nga të dyja palët.
Kështu ka deklaruar përfaqësuesi i BE-së në Kombet e Bashkuara, Stavros Lamperinos, në mbledhjen e Këshillit të Sigurimit të OKB-së për Kosovën. Ai ka theksuar se normalizimi i marrëdhënieve ndërmjet Kosovës dhe Serbisë mbetet një ndër kushtet thelbësore për rrugën evropiane të të dyja vendeve.
Lamperinos ka thënë se BE-ja riafirmon përkushtimin ndaj perspektivës evropiane të të gjithë Ballkanit Perëndimor, duke rikujtuar rëndësinë e zbatimit të Marrëveshjes së vitit 2023 për rrugën drejt normalizimit, si dhe të marrëveshjeve të mëparshme të arritura në dialogun e ndërmjetësuar nga BE-ja.
“Përfaqësuesja e Lartë mbetet e gatshme të thërrasë një takim të nivelit të lartë, por nevojitet vullnet nga të dyja palët. I inkurajojmë palët që ta marrin përsipër këtë përpjekje drejt normalizimit, të angazhohen në mirëbesim dhe ta mundësojnë një takim të tillë”, ka deklaruar ai.
Përfaqësuesi i BE-së ka shprehur gjithashtu shqetësim për situatën në veri të Kosovës dhe zhvillimet e muajve të verës, përfshirë rrënimet.
Ai ka përshëndetur marrëveshjen e 14 marsit me Kosovën lidhur me Ligjin për të Huajt.
Lamperinos u ka bërë thirrje palëve që të krijojnë kushte për një gjyqësor shumetnik dhe për kthimin e gjyqtarëve dhe prokurorëve serbë, si dhe të vazhdojnë përpjekjet për uljen e tensioneve.
Nga ana tjetër, Shtetet e Bashkuara të Amerikës i kanë bërë thirrje Kosovës dhe Serbisë që të bëjnë hapa konkretë drejt marrëdhënieve që çojnë në stabilitet dhe angazhim në dialog.
Përfaqësuesja e SHBA-së në Këshillin e Sigurimit të OKB-së, Tammy Bruce, ka thënë se paqja mes dy shteteve është esenciale.
E, Britania e Madhe i ka bërë thirrje Serbisë që personat përgjegjës për sulmin në Banjskë, përfshirë Milan Radoiçiqin, të dalin para drejtësisë. Përfaqësuesja e Britanisë në OKB, Jennifer MacNaughtan, ka përmendur edhe vrasjen e rreshterit të Policisë së Kosovës, Afrim Bunjaku, duke theksuar se kanë kaluar më shumë se tre vjet nga sulmi dhe Serbia nuk ka ndërmarrë asgjë.
Në deklaratën e saj në Këshillin e Sigurimit të Kombeve të Bashkuara, ajo ka kërkuar gjithashtu që Serbia të ofrojë qasje në arkiva për të mundësuar përparim në zbardhjen e fatit të personave të zhdukur gjatë luftës në Kosovë.
Përfaqësuesi i Francës në Këshillin e Sigurimit në Kombet e Bashkuara, Jay Dharmadhikari, ka folur për ndryshimet në Ligjin për Dhomat e Specializuara, që kanë kaluar në dy lexime në Kuvendin e Kosovës.
Ai ka thënë se këto ndryshime janë në ndesh me obligimet ndërkombëtare të Kosovës.
Përfaqësuesit e Rusisë dhe të Kinës në Këshillin e Sigurimit në Kombet e Bashkuara kanë folur për “sulme e shkelje të të drejtave të serbëve” në Kosovë.
Ata po ashtu ndër të tjera janë ankuar edhe për vendimin e KFOR-it për optimizmin e trupave pas përmirësimit të situatës së sigurisë në Kosovë.