Njësia e Komunikacionit Rrugor në Ferizaj gjatë një patrullimi rutinor ka hasur në dy shoferë që po bënin gara shpejtësie.

Ngjarja ka ndodhur mbërmë rreth orës  00:03 të natës në rrugën “Driton Islami.

Policia ka konstatuar se shoferët, L.I. (26 vjeç) dhe B.D. (25 vjeç), ishin duke zhvilluar gara shpejtësie, duke e tejkaluar kufirin e lejuar të shpejtësisë me një shpejtësi prej 91 km/h në një zonë ku kufizimi është 50 km/h.

Kontrolli është kryer me anë të një makine inteligjente të policisë, që mundëson matjen e shpejtësisë së automjeteve. Të dy shoferët janë ndalur për shkeljen e rëndë të ligjit, e cila mund të kishte pasur pasoja të rënda për sigurinë e qytetarëve.

Secili prej tyre është dënuar me një gjobë prej 500€, si dhe ka marrë 5 pikë negative. Përveç kësaj, të dy shoferët do të përballen me ndalimin e drejtimit të mjetit për 12 muaj.

Policia Rajonale e Ferizajt ka theksuar se do të vazhdojë me kontrolle të rregullta dhe aktivitete të intensifikuara për të garantuar sigurinë në rrugë dhe për të siguruar që rregullat e komunikacionit respektohen në çdo moment. Kjo masë është një sinjal i qartë për të gjithë ata që shkelin ligjin dhe rrezikojnë jetën e qytetarëve të tjerë.