Kuvendi i Kosovës është duke e mbajtur seancën lidhur me diskutimin për menaxhimin e COVID-19 në Kosovë.

Në këtë seancë ka pasur polemika mes deputetëve të opozitës ndaj shumicës parlamentare.

Një gjë të tillë e kanë pasur edhe ish-ministri i Shëndetësisë, Armend Zemaj dhe deputeti i PDK-së, Memli Krasniqi.

Zemaj duke iu përgjigjur Krasniqit lidhur me angazhimet e tij për sigurimin e vaksinës anti-Covid tha se aplikimi është bërë që nga 30 qershori i vitit 2020, gjersa ka përmendur edhe rastin e Agon Musliut, të riut që dyshohet se u vetëvra te Qendra e Studentëve në Prishtinë.

“Aplikimi i parë zyrtar i Ministrisë së Shëndetësisë ka qenë 30 qershori 2020. Nga ajo ditë ka fillu angazhimi jonë permanent për sigurimin e vaksinës. Është vetëm një fakt evident që na bën krenar në 10 muajt tonë të qeverisjes. Jemi i vetmi vend edhe në rajon edhe më tej që tri elemente nuk na kanë ndodhë që janë pozitive. Asnjë qytetar nuk ka mbetur pa shërbime. Asnjë i vetëm nuk ka vdekur jashtë institucioneve spitalore, dhe asnjë i vetëm nuk ka bërë vetëvrasje”, theksoi Zemaj.

E për këtë deklaratë ka reaguar deputeti nga radhët e Partisë Demokratike të Kosovës, Memli Krasniqi, i cili ka thënë se ministri i tanishëm i MSH-së, Arben Vitia dhe ai i kaluari, Armend Zemaj, kanë krijuar mjegull totale në vend.

“Ju dy, ministri dhe ish-ministri jeni tu krijuar mjegull totale. Ti e përmende edhe Modernan, diçka nuk është në rregull, ja i keni pasuar email-at gabim, ja dikush po rren. Ta kemi këtë qartësi”, tha Krasniqi.