Edhe pse shumë video që po vijnë në adresë të Gazetës Online “Reporteri.net”, por edhe nga raportimet e mediave tjera, ku shihet se shumica e rrugëve janë vështirë të kalueshme, ku si pasojë po ndodhin shumë aksidente, Ministria e Infrastrukturës përmes një njoftimi të dytë insiston se rrugët janë të kalueshme për qarkullim të automjeteve.

“Sipas raporteve nga menaxherët e MI-së, rrugët që janë në menaxhim të institucionit, në vazhdimësi janë duke u pastruar nga bora dhe është duke u hedhur kripa, me qëllim të parandalimit të ngricave”, thuhet në kumtesë.

“Megjithatë, MI bën thirrje për kujdes të shtuar nga të gjithë shoferët gjatë vozitjes, në përputhje me rregullat e komunikacionit dhe kushtet atmosferike, që të evitohen aksidentet e mundshme”.

Kjo ministri njofton se ka 14 kompani të angazhuara në shtatë regjione.

Por Reporteri.net publikoi pamje të reja që tregojnë kaosin që po shkaktohet në rrugët magjistrale nga mos pastrimi i borës nga rrugët.