Zëvendëssekretari i Përgjithshëm i NATO-s, Mircea Geoana, ka njoftuar për një bisedë telefonike të zhvilluar me emisarin Miroslav Lajçak, i angazhuari i BE-së në ndërmjetësim të dialogut Kosovë-Serbi.

Në njoftim, Geoana tha se NATO e mbështet fuqishëm dialogun mes të dy palëve derisa bëri thirrje që si Prishtina, edhe Beogradi, duhet të bëjnë kompromise, përcjell gazeta online Reporteri.net.

“NATO mbështet fuqishëm përpjekjet e vazhdueshme diplomatike me Beogradin dhe Prishtinën, nën udhëheqjen e BE-së. Është koha për të dyja palët që të bëjnë kompromise”, ka shkruar ai në Twitter.

“Angazhimi ynë për stabilitet të qëndrueshëm në Ballkanin Perëndimor, duke përfshirë edhe KFOR-in, është i fortë”, tha tutje.

Good to speak again w/ ?? SR @MiroslavLajcak. #NATO strongly supports ongoing diplomatic efforts w/ Belgrade & Pristina led by the #EU. It's time for both sides to make compromises. Our commitment to lasting stability in the W. Balkans, including through @NATO_KFOR is rock-solid.

— Mircea Geoana (@Mircea_Geoana) March 15, 2023

Angazhim i theksuar është parë kohëve të fundit nga BE dhe ShBA, në pritje të takimit të së shtunës mes kryeministrit Kurti dhe presidentit Vuçiq, në Ohër, më 18 mars.

Pjesë e këtij takimi, ku do të diskutohet mbi aneksin e zbatimit të marrëveshjes së arritur në Bruksel, më 27 shkurt, do të jenë emisarët Miroslav Lajçak dhe Gabriel Escobar, si dhe Shefi i Diplomacisë së BE-së, Josep Borrell.