Policia sqarohet për arrestimin e dhunshëm të të moshuarit në Vushtrri

Një arrestim aspak i këndshëm ka ndodhur në sheshin e Vushtrrisë ku Policia është konfrontuar me fjalë nga një qytetar i moshuar që duket në dhimbje.


Lexues të Gazetës Online “Reporteri.net’ kanë dërguar pamje nga momenti i arrestimit, ku i moshuari dëgjohet derisa bërtet “unë vetë vij,” dhe “ma këpute dorën” pasi polici duket se e mban për dore.

Reklamë

Zyrtari policor e kishte kapur të moshuar derisa priste ardhjen e patrullës tjetër policore.

Një dëshmitar ka treguar se kjo ka ndodhur për shkak të mos-mbajtjes së maskës së pandemisë.

Lidhur me këtë rast Policia e Kosovës ka dalë me një sqarim.

“Personi në fjalë fillimisht kishte refuzuar vendosjen e maskës, e po ashtu kishte refuzuar edhe prezantimin e dokumentit identifikues (letërnjoftimin) të kërkuar nga zyrtarët policorë.
Vlen të potencohet se zyrtarët policorë kishin kërkuar dhe njëherit i kishin dhënë urdhër verbal disa herë personit në fjalë, por i njëjti duke refuzuar nuk i ishte bindur urdhrave të zyrtareve policorë duke aluduar se është i sëmurë, por pa argumentuar me ndonjë dokument mjekësor. Zyrtarët policorë janë detyruar të ndërmarrin veprime ligjore duke e vënë nën kontroll personin, të cilin pastaj e kanë dërguar në stacionin policor për intervistim dhe procedura të mëtejme”, ka sqaruar Policia.

Ata kanë thënë se personi në fjalë nuk ka dëshmuar asnjë dokument se është i sëmurë dhe nga verifikimet e bëra i njëjti ka rezultuar se është i njohur për shumë vepra penale.

“Në konsultim me gjyqtarin ndaj të njëjtit është iniciuar rasti “Mosrespektim i urdhrit të policit (PRQP)”, ku pas intervistimit rasti vazhdon procedurë të rregullt, për trajtim të mëtejme nga gjykata kompetente. Policia e Kosovës, pas çdo operacioni apo veprimi policor, vlerëson dhe njëherit si në këtë rast trajton veprimet dhe sjelljet e zyrtarëve policorë se a janë në harmoni me rregullat dhe procedurat policore”, ka njoftuar Policia.