Policia e Republikës së Kosovës ka hapur rast pas incidentit që ka ndodhur sot në stadiumin e Gjilanit, ku tifozët e skuadrës së Gjilanit sulmuan fizikisht portierin nga Ballkani i Suharekës, Stivi Frashëri, përcjell Reporteri.net.

Lidhur me rastin në polici, pra për hapjen e këtij rasti, për Klankosova.tv e ka konfirmuar zëdhënësi i Policisë së Kosovës për rajonin e Gjilanit, Ismet Hashani.

“Po, është hapur rast dhe me këtë po merren njësitet të cilat janë në vendin e ngjarjes”, është shprehur Hashani.

Sulmi ndaj portierit të Ballkanit erdhi pasi Enea Koliçi, portieri i skuadrës së Gjilanit, në një goditje nga këndi shënoi një gol në minutat shtesë teksa barazoi rezultatin për 1-1.