Drejtori i të ashtuquajturës Zyra për Kosovën në qeverinë serbe, Marko Gjuriq, ka reaguar pas deklaratës së ambasadores së Kosovës në Shtetet e Bashkuara të Amerikës, pasi ajo tha se heshtja e ndërkombëtarëve për fyerjet e Daçiqit dhe Vulinit ndaj shqiptarëve është shurdhuese.

Në një përgjigje në rrjetin social Twitter, Gjuriq ka thënë se për herë të parë pajtohet me Vlora Çitakun, por heshtja e bashkësisë ndërkombëtare është shurdhuese për serbët, shkruan Reporteri.net.

“Për herë të parë pajtohemi, heshtja e bashkësisë ndërkombëtare është vërtetë shurdhuese – 20 vjet pa drejtësi për mijëra serbë të vrarë dhe të pastruar etnikisht nga Kosova, qindra kisha të krishtera të djegura dhe rini e vjedhur.”, ka shkruar Gjuriq në Twitter.

Po ashtu ai ka deklaruar se ofrojnë mbështetjen e plotë për Dhomat e Specializuara Ndërkombëtare për gjoja krimet e luftës së Ushtrisë Çlirimtare të Kosovës

For once we agree-silence of the intl community is indeed deafening – 20 years no justice for thousands of murdered and "ethnically cleansed" Serbs from Kosovo, hundreds of burned Christian churches and stolen youth. Full support for the Special intl chambers for KLA war crimes.

— Марко Ђурић (@markodjuric) October 3, 2020

Vlora Çitaku, përmes një shkrimi në llogarinë e saj në Twitter, e ka komentuar letrën e ministres së Jashtme, Meliza Haradinaj Stublla, drejtuar ambasadorëve të Kuintit, lidhur me kërcënimet e ministrit të Jashtëm të Serbisë, Ivica Daçiq dhe komunikatës të ministrit të Mbrojtjes së Serbisë, Aleksandër Vulin, ku iu referohet shqiptarëve si “shiptarima”.