Avokati i Aurona Pelajt, e dyshuar për keqtrajtim ndaj një të moshuare në shtëpinë e të moshuarve “Orenda” në Pejë, ka hedhur poshtë pretendimet e avokatit të familjes së të moshuarës, se Pelaj mund të ketë ikur Gjermani.

Në një përgjigje për Gazetën Online Reporteri.net, avokati i Pelajt, Veton Berisha thotë se klientja e tij ndodhet në Kosovë dhe nuk ka asnjë arsye të largohet nga vendi.

“Lidhur me pretendimet e avokatit Meshar Selimaj se klientja ime Aurona Pelaj ka ikur në shtetin e Gjermanisë mund të deklaroj se nuk qëndron ngase ajo gjindet në Kosovë në shtëpinë e saj, nuk ka asnjë arsye që të largohet nga Kosova”.

“Ajo është një qytetare e lire e cila mund të lëviz lirshëm pa asnjë kufizim mirëpo e njëjta gjindet këtu, sot kam komuniku me të përmes te telefonit dhe e njëjta nuk ka ndërmend të largohet nga shteti i Kosovës”, ka thënë Berisha për Reporteri.net.

Kujtojmë se ende nuk është ngritur aktakuzë e as nuk është mbajtur asnjë seancë gjyqësore deri më tani në rastin e sulmit ndaj të moshuarës brenda qendrës “Orenda” në Pejë, në nëntor të vitit të kaluar.

Nga Prokuroria e Pejës ditë më parë kanë thënë për Reporteri.net se aktakuza nuk është ngritur ende, pasi rasti është duke u hetuar.

Tri infermiereve të dyshuara të përfshira në këtë rast, Aurona Pelaj, Altina Rexhepi, dhe Remzije Kuqi – Gashi, u ishte caktuar masa e paraburgimit prej 30 ditësh më 2 nëntor nga Gjykata e Pejës.

Por ato u liruan nga paraburgimi me vendim të Gjykatës Supreme më 25 nëntor të vitit të kaluar.

Në vendimin e Supremes të siguruar nga Gazeta Online Reporteri.net, thuhej se të pandehurave u ndërpritet paraburgimi dhe lirohen për t’u mbrojtur në liri.

Aty potencohej se dy gjykatat e dy instancave më të ulëta gjyqësore nuk
kanë dhënë arsyetim bindës dhe të qëndrueshëm përkitazi me bazat e paraburgimit. /Reporteri.net/

Avokati: Aurona Pelaj mund të ketë ikur në Gjermani, hetimet s’janë kryer ende