Dy milionë euro janë transferuar nga Thesari i Shtetit në llogarinë e një kompanie private me emrin ‘LDA Group Shpk’, në pronësi të Kadri e Valon Shalës. Gazeta Online ‘Reporteri.net’ raportoi sot se Kadri Shala është anëtar i partisë Nisma Socialdemokrate. Por, edhe e bija e tij Hajria punon si këshilltare e zëvendëskryeministres së NISMA’s, Albulena Balaj-Halimi.

---

Ky artikull i Reporteri.net u dokumentua edhe nga postimet e degës së NISMA’s në Drenas ku Kadri Shala ka qenë anëtar i kryesisë nga Llapushniku.

Nga ana tjetër, Indeksonline ka siguruar një fotografi ku Kadri Shala shihet krah liderit të partisë Fatmir Limaj i shoqëruar edhe nga vajza e tij Hajrie Shala e cila është aktualisht këshilltare e zëvendëskryeministres Albulena Balaj-Halimi.

Nisma Socialdemokrate, pas raportimit të Gazetës Online ‘Reporteri.net’ është distancuar nga anëtari i saj Kadri Shala, i cili është njëri nga biznesmenët, në arrati, i dyshuar për përfshirjen në vjedhjen e 2 milionë Eurove nga Thesari i Shtetit.

Sekretari i Përgjithshëm i Nismës, Bilall Sherifi, ka thënë se ai nuk e njeh atë, por kushdo qoftë e dënon këtë akt.

“Nisma distancohet nga një veprim i tillë dhe fton gjithë sistemin e drejtësisë ta ndjekin këtë rast deri në fund për të kthyer paratë deri në fund dhe ata të marrin dënimin”, ka thënë ai në Kanal 10.

Më tutje, ai ka thënë se është për t’u dënuar ky veprim dhe se kjo duhet të shërbeje si alarm për siguri më të madhe në sistemin financiar.

“E dënoj fuqishëm aktin e vjedhjes së parave, por gjithkund në botë ku punohet me para duhet të këtë siguri më të madhe”, ka shtuar ai.

Kujtojmë se për këtë skandal është arrestuar një punëtor i Thesarit të Kosovës, Labinot Gruda, anëtar i PDK-së, i cili dyshohet se ka bërë transferimin e 2,077,995 milionë eurove përmes katër transaksioneve të ndryshme, në adresë kompanisë, LDA Group Shpk, me bazë në Llapushnik.

Anëtari i PDK-së Labinot Gruda ia ka mundësuar anëtarit të NISMA’s që t’i marrë dy milionë eurot nga Theasri i Republikës së Kosovës.

Pronarët e kësaj kompanie Valon Shala edhe Kadri Shala janë në arrati, shkruan Reporteri.net.

Policia ka njoftuar zyrtarisht se të martën në mbrëmje, pas hetimeve të zhvilluara, është arritur të arrestohet një i dyshuar derisa dy të tjerë gjenden në arrati. Bëhet fjalë për Labinot Grudën, ku pos pronës së tij në Komoran, është bastisur edhe banesa në Prishtinë dhe i është konfiskuar një veturë e tipit Audi A4, shkruan Reporteri.net.

“LDA Group” është kompania të cilës iu transferuan paratë, pronë e Valon Shalës, sipas të dhënave publike të cilat figurojnë në Agjencinë për Regjistrimin e Bizneseve të Kosovës (ARBK).

Valon Shala, bashkë me familjarin e tij Kadri Shala janë në arrati për të njëjtin rast që u arrestua sot Gruda, shkruan Gazeta Online ‘Reporteri.net’.

Kompania ka bazën në Komunën e Drenasit, konkretisht në fshatin Llapushnik të kësaj komune.

Bazuar në të dhënat e publikuara në ARBK, kompania “LDA Group” është regjistruar si biznes më 21 gusht të vitit 2019.