Drejtori i të ashtuquajturës Zyrë për Kosovën në Qeverinë e Serbisë, Petar Petkoviq, ka thënë se për incidentet e djeshme në Zveçan është përgjegjës i vetëm kryeministri i Prishtinës, Albin Kurti.

Ai po ashtu ka akuzuar edhe pjesëtarët e KFOR-it, duke thënë se në vend që të mbrojnë serbët, kanë ndihmuar  siç ka thënë “kryetarët e rremë të hyjnë në komunat serbe”.

“Dje zjarrvënësi ballkanik Kurti ka dashur t’i vërë zjarrin jo vetëm Kosovës, por edhe gjithë rajonit. Rezultati i atij konflikti, në të cilin donte të na shtynte të gjithëve, është se nga pala serbe u plagosën 52 civilë, tre prej tyre seriozisht, 41 ushtarë të KFOR-it, tre prej tyre më të vështirë…”, ka thënë ndër të tjera Petkoviq.

Që nga e premtja, serbët në veri të Kosovës janë duke protestuar kundër kryetarëve të rinj të dalë nga zgjedhjet e 23 prillit.

Si pasojë e protestave të dhunshme një ditë më parë, u plagosën 30 ushtarë të KFOR-it, e u dëmtuan shumë makina të mediave në Kosovë.

Policia e Kosovës ka thënë se situata aktualisht është e qetë.