Policia e Kosovës ka njoftuar se ka ndërmarrë masat e nevojshme të sigurisë për protestën e paralajmëruar sot në sheshin “Skënderbeu” në Prishtinë, e organizuar nga platforma “Liria ka emër” në shenjë pakënaqësie lidhur me aktgjykimin e Gjykatës Speciale ndaj ish-krerëve të UÇK-së.
Protesta është paralajmëruar të nisë në orën 16:00, ndërsa Policia ka bërë të ditur se zyrtarët policorë do të jenë të pranishëm në terren para, gjatë dhe pas përfundimit të saj.
“Policia e Kosovës, lidhur me protestën e paralajmëruar për sot në orën 16:00, në sheshin ‘Skënderbeu’ në Prishtinë, nga platforma ‘Liria ka emër’ për të shprehur vazhdimin e pakënaqësive lidhur me aktgjykimin e Gjykatës Speciale në Hagë ndaj ish-krerëve të UÇK-së, ka ndërmarrë masat e nevojshme policore për ofrimin e sigurisë, ruajtjen e rendit e qetësisë publike si dhe mbarëvajtjen e protestës para, gjatë dhe deri në përfundimin e saj”, thuhet në komunikatën e Policisë.
Policia ka theksuar se e njeh të drejtën e qytetarëve për protestë dhe shprehje të lirë, duke kërkuar që tubimi të zhvillohet në mënyrë paqësore dhe brenda kornizës ligjore.
“Policia e Kosovës, sipas Ligjit mbi tubimet publike, e njeh të drejtën e qytetarëve për shprehjen e lirë përmes tubimeve e protestave të qeta dhe sipas detyrës zyrtare angazhohet që mbarëvajtja e protestës të kalojë e qetë dhe pa ndonjë incident dhe që pjesëmarrësit në protestë të shprehin qëllimin e tyre në mënyrë demokratike dhe në suaza ligjore”, thuhet më tej.
Kufizime në qarkullim
Për shkak të protestës dhe lëvizjes së pjesëmarrësve, Policia ka paralajmëruar kufizime dhe ndërprerje të përkohshme të qarkullimit në disa rrugë të kryeqytetit.
Sipas planifikimeve policore, nga ora 15:00 do të mbyllen përkohësisht për qarkullim rrugët “Luan Haradinaj” dhe “Enver Zymeri”.
“Varësisht nevojës operative mund të ketë edhe rrugë të tjera në të cilat mund të ndërpritet qarkullimi përkohësisht”, ka njoftuar Policia.
Për menaxhimin e qarkullimit dhe, nëse është e nevojshme, orientimin e automjeteve drejt rrugëve alternative, në terren do të angazhohen edhe njësitë policore të trafikut.
Policia ka apeluar te qytetarët që të tregojnë kujdes të shtuar gjatë lëvizjes në kryeqytet dhe të respektojnë rregullat e trafikut.
“Policia e Kosovës, falënderon organizatorët dhe qytetarët për bashkëpunimin dhe mirëkuptimin e treguar në vazhdimësi ndaj policisë dhe njëkohësisht apelon që të kenë kujdes të shtuar, të respektojnë ligjet dhe rregullat në trafikun rrugor në interes të sigurisë së përgjithshme”, thuhet në komunikatë.
Kuvendi i Komunës së Prizrenit ka miratuar unanimisht deklaratën lidhur me aktgjykimin e 16 shtatorit ndaj ish-drejtuesve të Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi dhe Rexhep Selimi.
Sipas njoftimit të Komunës së Prizrenit, deklarata u miratua në mbledhjen e jashtëzakonshme të Kuvendit, të mbajtur më 1 tetor 2026, në prani të anëtarëve të Kuvendit, monitoruesve dhe përfaqësuesve të mediave.
Në deklaratë, Kuvendi shpreh mospajtim të thellë me aktgjykimin e shkallës së parë të Dhomave të Specializuara të Kosovës, duke theksuar se përgjegjësia penale është individuale dhe nuk duhet të interpretohet si përgjegjësi kolektive e UÇK-së dhe luftës së saj.
Kuvendi i Prizrenit gjithashtu ka shprehur solidaritet me Thaçin, Veselin, Krasniqin dhe Selimin, si dhe me familjet e tyre.
Në deklaratë u bëhet thirrje qytetarëve që, pavarësisht dhimbjes dhe emocioneve, të ruajnë qetësinë, dinjitetin dhe unitetin, duke i shprehur qëndrimet në mënyrë paqësore dhe institucionale.
Në fund, duke iu referuar formulimit “Në emër të popullit të Kosovës” gjatë shpalljes së aktgjykimit, Kuvendi i Komunës së Prizrenit ka përcjellë mesazhin: “JO NË EMRIN TIM!”
Dhomat e Specializuara të Kosovës (DhSK) në Hagë, ia kanë vazhduar masën e paraburgimit ish-presidentit Hashim Thaçi në rastin ku bashkë me Bashkim Smakajn, Isni Kilajn, Fadil Fazliun dhe Hajredin Kuçin, ngarkohen për vepra penale kundër administrimit të drejtësisë.
Vendimi është marrë nga gjykatësi i vetëm i këtij rasti, Christopher Gosnell më 30 shtator 2026, raporton “Betimi për Drejtësi“.
Sipas vendimit, gjykatësi konstatoi se vazhdojnë të ekzistojnë rreziqet që Thaçi mund të pengojë ecurinë e procesit apo të kryejë vepra penale të tjera.
Po ashtu, për vazhdimin e paraburgimit, Specialja bën të ditur se gjykatësi mori parasysh edhe faktin që Thaçi u shpall fajtor dhe u dënua në gjykimin për krime lufte.
“Gjykatësi mori parasysh gjithashtu edhe shpalljen fajtor dhe dënimin e Thaçit në çështjen gjyqësore KSC-BC-2020-06 kohët e fundit dhe konstatoi se ato nuk e ndryshonin nevojën për rishikime periodike të paraburgimit të tij në çështjen aktuale, që në parim vlerësohet në bazë të faktorëve në lidhje me këtë çështje”, thekson Specialja.
Gjykatësi vlerësoi se caktimi i paraburgimit vazhdon të mbetet i domosdoshëm dhe proporcional.
Kujtojmë se në rastin për krime lufte, Specialja shpalli aktgjykimin më 16 shtator 2026, me të cilin Thaçi u dënua me 25 vjet burgim. Me aq vite burgim u dënua edhe Jakup Krasniqi. Ndërkaq, Kadri Veseli me 18 vjet burgim e Rexhep Selimi me 13.
Në gjykimin për veprat penale kundër administrimit të dejtësisë, më 14 shtator 2026 ka përfunduar paraqitja e fjalëve përfundimtare nga palët në procedurë.
Në seancën fillestare më 27 shkurt 2026, Hashim Thaçi, Bashkim Smakaj, Fadil Fazliu, Isni Klilaj dhe Hajredin Kuçi, u deklaruan të pafajshëm për veprat penale që iu vihen në barrë.
Po atë ditë (27 shkurt 2026), nisi dëshminë edhe dëshmitari i parë në këtë çështje gjyqësore, i cili ishte me masa mbrojtëse. Dëshmia e tij përfundoi më 2 mars 2026.
Më 3 dhe 4 mars 2026 dëshmoi dëshmitari i dytë Koen Herlaar- ekspert i kriminalistikës në Institutin e Kriminalistikës së Holandës. Po më 4 mars nisi dëshminë dëshmitari i tretë, Chrisopher Kelly- hetues i forenzikës digjitale. Ky dëshmitar e përfundoi dëshminë më 5 mars. Ndërsa, si dëshmitare e mbrojtjes së Thaçit dëshmoi ekspertja e transkriptimit në fushën e kriminalistikës, Helen Fraser. Ajo dëshmoi mç 11 dhe 12 maj 2026.
Ndryshe, Hashim Thaçi ndodhet në Qendrën e Paraburgimit në Hagë që nga nëntori i vitit 2020. Ai është duke u gjykuar për krime lufte, si dhe më 2024 i është ngritur aktakuza kundër administrimit të drejtësisë.
Lidhur me rastin kundër administrimit të drejtësisë, Bashkim Smakaj, Fadil Fazliu dhe Isni Kilaj u arrestuan më 5 dhjetor 2024 në Kosovë dhe u transferuan në objektin e paraburgimit në DhSK, më 6 dhjetor 2024 në bazë të aktakuzës së konfirmuar dhe fletarrestimeve të lëshuara nga Haga.
Ndërsa, Thaçit i është dorëzuar fletarrestimi në objektin e paraburgimit në Hagë më 5 dhjetor 2024, gjithnjë sipas njoftimit të DhSK-së.
Kurse, Hajredin Kuçit i është dorëzuar aktakuza e konfirmuar dhe fletëthirrja për t’u paraqitur para gjykatëses së procedurës paraprake për paraqitjen e parë, e cila u mbajt 9 dhjetor.
Sipas aktakuzës, Thaçi individualisht dhe përmes veprimeve të përbashkëta me grupet; Grupi Fazliu (Fadil Fazliu dhe Fahri Fazliu), Grupin Smakaj (Bashkim Smakaj, Blerim Shala dhe Artan Behrami) si dhe Grupin Kilaj (Isni Kilaj dhe Vllaznim Kryeziu), kanë ndjekur një model të sjelljes për të penguar personat zyrtarë në kryerjen e detyrave zyrtare.
Në aktakuzë thuhet se Thaçi ka udhëhequr dhe marrë pjesë në këto përpjekje përmes vizitave të tij në objektet e paraburgimit gjatë kohës sa ishte i paraburgosur në kuadër të gjykimit të tij për krime lufte dhe krime kundër njerëzimit.
Aty thuhet se anëtarët e Grupit Fazliu, Grupit Smakaj dhe Grupit Kilaj u koordinuan për të ndikuar në dëshmitarët e ZPS-së gjatë vizitave jo të priveligjuara të datave 2 korrik, 9 shtator dhe 6 tetor 2023.
Si rrjedhojë, ndaj Thaçit rëndojnë tri akuza për pengim të personit zyrtar në kryerjen e detyrave zyrtare, tri për shkelje të fshehtësisë së procedurës dhe katër akuza për mosbindje ndaj gjykatës.
Ndërsa, Kilaj, Smakaj dhe Fazliu akuzohen për tentativë të pengimit të personave zyrtarë në kryerjen e detyrave zyrtare dhe mosbindje ndaj gjykatës. Kurse, Kuçi i ka dy akuza për mosbindje ndaj gjykatës.
Kryetari i Komisionit për Arsim, Shkencë dhe Teknologji, Enver Hoxhaj, e ka lëshuar mbledhjen e këtij komisioni, në përputhje me vendimin e Grupit Parlamentar të PDK-së për të bojkotuar punën e komisioneve parlamentare deri në procedimin e ndryshimeve në Ligjin për Dhomat e Specializuara.
Hoxhaj, i cili drejton komisionin në emër të PDK-së, para largimit u bëri thirrje deputetëve dhe subjekteve politike që të angazhohen për ndryshimin e ligjit për Gjykatën Speciale.
Ai tha se nuk do të marrë pjesë në diskutimet për fushëveprimin e komisionit, duke ua lënë anëtarëve të tjerë vazhdimin e mbledhjes.
“Unë nuk do të propozoj asgjë për fushëveprimin e komisionit. Kam dashur të jem fer me juve dhe konkret vetëm se i takon kushtëzimit të komisionit. Unë e lëshoj këtë mbledhje. I ftoj kolegët dhe të gjitha subjektet politike që ta amandamentojnë ligjin për Gjykatën Speciale. Kolegët e tjerë çfarëdo që keni prej sugjerimeve sa i takon fushëveprimit të këtij komisioni besoj që mund t’i vazhdoni”, tha ai.
Pas largimit të Hoxhajt, mbledhjen e ka udhëhequr nënkryetarja e komisionit, Arjeta Fejza.
Ajo tha se situata aktuale politike dhe institucionale po ndikon edhe në punën e komisionit, duke theksuar se për çështjen e Ligjit për Dhomat e Specializuara tashmë ka diskutime ndërmjet subjekteve politike, si dhe qëndrime të Qeverisë.
“Sa i përket çështjes së ligjit, tashmë ka një diskutim i cili është duke u bërë nga subjektet politike, ka një qëndrim edhe të ministrisë dhe të kryeministrit në këtë proces. Në anën tjetër, ne si komision, siç u përmend edhe nga parafolësit, kemi çështje të cilat konkretisht e afektojnë mënyrën se si do të funksionojë arsimi në dritë të tij. Andaj pajtohem që ne nuk jemi në rrethana normale për të funksionuar. Uroj që sa më shpejt të konsolidohen të gjitha institucionet e Republikës së Kosovës, edhe ne vërtet mund të vazhdojmë me punën tonë edhe si komision edhe si kuvend, më konkretisht si komision për arsim për të trajtuar të gjitha çështjet që bien mbi fushëveprimtarinë tonë”, tha Fejza.
Pavarësisht largimit të Hoxhajt, mbledhja vazhdoi me anëtarët e tjerë të komisionit.
Ata votuan unanimisht për konstituimin e Komisionit për Arsim, Shkencë dhe Teknologji, si dhe për fushëveprimin e tij.
Deputetët e Partisë Demokratike të Kosovës janë larguar nga mbledhja e Komisionit për Mbikëqyrjen e Agjencisë së Kosovës për Inteligjencë (AKI), menjëherë pas konstituimit të tij.
Ata kanë bërë të ditur se vendimi për t’u larguar lidhet me kërkesën e PDK-së që në Kuvend të procedohet sa më shpejt plotësim-ndryshimi i Ligjit për Dhomat e Specializuara të Kosovës.
Deputetja Besa Kabashi-Ramaj tha se PDK-ja e konsideron funksionalizimin e komisioneve parlamentare të rëndësishëm, por sipas saj, në rrethanat aktuale çështja e Dhomave të Specializuara duhet të trajtohet me prioritet.
“Konstituimi i institucioneve është shumë i rëndësishëm dhe prandaj edhe ishim pjesë e këtij komisioni. Mirëpo, pas konstituimit u larguam, sepse për momentin nuk ka prioritet më të madh për Republikën e Kosovës sesa procedimi i plotësim-ndryshimit të Ligjit për Specialen”, tha ajo.
Në të njëjtën linjë u shpreh edhe deputeti Rrahman Rama. Ai deklaroi se PDK-ja nuk do të marrë pjesë në mbledhjet e komisioneve të tjera parlamentare deri në procedimin e këtij ligji.
“Për ne është prioritet mbi prioritetet. Nuk do të marrim pjesë në asnjë komision pa u kryer ky ligj”, deklaroi Rama.
Ai tha se PDK-ja pret që Qeveria ta përmbushë zotimin për ta proceduar projektligjin brenda kësaj jave, duke theksuar se partia kërkon që procedurat të nisin sa më shpejt.
Rama foli edhe për takimet e paralajmëruara ndërmjet kryeministrit Albin Kurti dhe kryetarit të PDK-së, Bedri Hamza, për çështjen e zgjedhjes së presidentit.
Sipas tij, para diskutimeve për këtë çështje, PDK-ja kërkon që të trajtohet Ligji për Dhomat e Specializuara, përfshirë mbikëqyrjen e procesit dhe sigurimin e përkrahjes financiare.
“Për ne prioritet është që Ligji për Dhomat e Specializuara të ketë mbikëqyrje të procesit dhe përkrahje financiare. Pas kësaj mund të ulemi dhe të diskutojmë edhe për çështjet e tjera, përfshirë funksionalizimin sa më të shpejtë të institucioneve”, tha Rama./eo/
Transporti publik në kryeqytet do të jetë pa pagesë sot, nga ora 14:00 deri në 20:00, me rastin e organizimit të marshit për Ushtrinë Çlirimtare të Kosovës (UÇK).
Sipas njoftimit, masa është marrë me qëllim të lehtësimit të lëvizjes së qytetarëve dhe pjesëmarrjes në marsh.
Transporti publik do të jetë falas gjatë gjithë intervalit kohor prej gjashtë orësh.
Sot në sheshin “Skënderbeu” në Prishtinë, duke filluar nga ora 16:00 do të mbahet protestë gjithëpopullore në mbështetje të ish-krerëve të Ushtrisë Çlirimtare të Kosovës, të cilët u dënuan me 81 vjet burgim nga Gjykata Speciale.
Protesta është paralajmëruar nga platforma Liria ka Emër. Protesta po vazhdojnë tash e 15 ditë me radhë kundër vendimit të Speciales.
Gjykata Speciale më 16 shtator i dënoi me gjithsej 81 vjet burgim ish-krerët e UÇK-së.
Me 25 vjet burgim u dënua Hashim Thaçi, po me 25 vjet Jakup Krasniqi, 18 vjet Kadri Veseli dhe me 13 vjet Rexhep Selimi.
Nga 1 Tetori 1997 te protesta e nesërme, historia e një date simbol të protestës shqiptare në Kosovë
Endrit Thaçi, djali i ish-presidentit të Kosovës, Hashim Thaçi, ka ndarë pamje nga protestat që po zhvillohen në mbështetje të ish-krerëve të Ushtrisë Çlirimtare të Kosovës.
Përmes fotografisë së publikuar, Endrit Thaçi ka përcjellë enjë mesazh për babanë e tij, Hashim Thaçin.
“Kosova të don, ti e din”, thuhet në mesazhin e tij.
Përfaqësuesit e platformës qytetare “Liria Ka Emër”, Ismail Tasholli dhe Arbnora Zogiani, mbajtën sot konferencë për media, një ditë para protestës masive “Jo në emrin tim”.
Në konferencë iu bë thirrje qytetarëve të bashkohen më 1 tetor, në orën 16:00, në sheshin “Skënderbeu” në Prishtinë, për të kundërshtuar aktgjykimin e Gjykatës Speciale ndaj ish-krerëve të UÇK-së.
Tasholli e cilësoi aktgjykimin të padrejtë dhe të papranueshëm, duke theksuar se ai nuk mund të merret në emër të popullit të Kosovës.
“Kosova nuk e ka nisur luftën. Kosova nuk ka qenë agresori. Shqiptarët e Kosovës kanë qenë viktima të një regjimi që për vite të tëra ua kishte mohuar lirinë, të drejtat dhe dinjitetin”, tha ai.
Sipas Tashollit, drejtësia duhet të vlejë për të gjithë, por nuk mund të jetë selektive dhe as të shkëputet nga e vërteta historike. Ai theksoi se reagimi qytetar ndaj aktgjykimit ka kaluar kufijtë e Kosovës, me protesta dhe mobilizim të shqiptarëve në Evropë dhe më gjerë.
Duke kujtuar protestën studentore të 1 tetorit 1997, Tasholli tha se nesër, 29 vjet më vonë, qytetarët do të mblidhen sërish në Prishtinë për të kërkuar drejtësi.
Ai kërkoi gjithashtu veprim të menjëhershëm nga Qeveria dhe Kuvendi për shqyrtimin dhe procedimin e Projektligjit për ndryshimin dhe plotësimin e Ligjit për Dhomat e Specializuara.
“Institucionet duhet të përdorin çdo mjet juridik dhe shtetëror që është në dispozicion dhe në përputhje me ligjin, për mbrojtjen e të drejtave të të dënuarve dhe për të vazhduar betejën juridike deri në përfundimin e të gjitha procedurave”, deklaroi Tasholli.
“UÇK-ja na bashkon! Nga studentët e vitit 1997 deri te qytetarët e sotëm, një gjë nuk ka ndryshuar: ne nuk e harrojmë lirinë, nuk e harrojmë sakrificën dhe nuk heqim dorë nga drejtësia”, shtoi ai.
Ndërkaq, Arbnora Zogiani ftoi qytetarët që nesër t’i bashkohen protestës me familjarët, miqtë dhe kolegët e tyre, duke njoftuar se nga çdo qytet i Kosovës do të ketë transport të organizuar. Oraret dhe vendet e nisjes tashmë janë publikuar.
Zogiani falënderoi mediat për përcjelljen e aktiviteteve dhe për jehonën që i kanë dhënë zërit qytetar, ndërsa veçoi kontributin e diasporës në mobilizimin kundër aktgjykimit.
“Diaspora jonë edhe një herë po dëshmon se largësia gjeografike nuk do të thotë largësi nga Kosova”, tha ajo, duke vlerësuar protestat, tubimet dhe aktivitetet e organizuara nga bashkatdhetarët në Evropë, Shtetet e Bashkuara dhe vende të tjera të botës.
Në këtë vazhdë, Zogiani njoftoi se më 10 tetor në Bruksel do të mbahet protesta e radhës, e organizuar nga diaspora shqiptare, dhe ftoi bashkatdhetarët të marrin pjesë.
Lirim Greiçevci, pjesë e ekipit mbrojtës të ish-presidentit Hashim Thaçi, ka reaguar ndaj deklaratave të ish-prokurorit Clint Williamson, të cilin e ka akuzuar për deklarata të rreme lidhur me hetimet për pretendimet e raportit të Dick Martyt.
Me anë të një shkrimi në ‘Facebook’, Greiçevci e ka quajtur Williamsonin “prokuror mashtrues”, duke thënë se ai është “më i dëmshëm se Dick Marty”.
“Paska folur sërish ky prokurori mashtrues, Clint Williamson. Ai është më i dëmshëm se Dick Marty. Pasi u mor me hetimin e raportit të këtij të fundit, për gati tri vite, doli në konferencë shtypi në Bruksel dhe gënjeu se i kishe “vërtetuar përgjithësisht” akuzat në raportin e Martyt. Gënjeu edhe më zi, duke thënë se trafikimi me organe kishte ndodhur në disa raste të kufizuara, të cilat mund të numëroheshin “në gishta të duarve”, dmth jo më shumë se dhjetë raste. Gënjeu gjithashtu se e kishte të gatshme një aktakuzë dhe se vetëm po priste formimin e një gjykateje”, ka deklaruar Greiçevci.
Reagimi i tij vjen pas intervistës së prokurorit Clint Williamson për BIRN-in, i cili ndër të tjera deklaroi se Kosova s’arriti ta përgatisë publikun për vendimin ndaj Thaçit dhe të tjerëve.
“Si e dimë që gënjeu Williamson? Ekipet mbrojtëse kanë parë dokumentacionin e tij që ka lënë prapa ai. Ai nuk kishte vërtetuar asgjë, aq më pak trafikim organesh. Aktakuza e tij fantome nuk u dorëzua as nuk u konfirmua asnjëherë. Ai i hetoi ngjarjet e pasluftës në Kosovë. Trupi gjykues, edhe ashtu, i hodhi poshtë të gjitha akuzat pas 20 qershor 1999”, deklaron më tej Greiçevci.
“Kosova duhet të kërkojë përgjegjësi nga ky mashtrues. Ai duhet të na tregojë se a mashtroi vetë, apo e nxiti dikush tjetër të mashtrojë. Tash flitet se ai punon për ndjekjen e krimeve në Ukrainë. Vaj halli për Ukrainën”, përmbyll shkrimin ai.
Gjyqtarja franceze, Michele Picard do të kryesojë Panelin e Gjykatës së Apelit në procedurën e apelit në rastin ndaj Hashim Thaçit, Kadri Veselit, Jakup Krasniqit dhe Rexhep Selimit në Dhomat e Specializuara të Kosovës në Hagë.
Kjo bëhet e qartë nga vendimi i publikuar më 29 shtator 2026 lidhur me modalitetet e pjesëmarrjes së viktimave në procedurën e apelit.
Në dokumentin zyrtar, Paneli i Apelit përbëhet nga Michele Picard, Kai Ambos dhe Nina Jorgensen, ndërsa në fund të vendimit Picard identifikohet shprehimisht si gjyqtare kryesuese.
Zhvillimi vjen në kohën kur procedura ndaj katër ish-krerëve të UÇK-së ka hyrë në fazën e apelit pas Aktgjykimit të shpallur më 16 shtator 2026.
Më 29 shtator, Paneli i Gjykatës së Apelit miratoi pjesërisht kërkesën e Mbrojtjes për zgjatjen e afatit për dorëzimin e njoftimeve për apel kundër Aktgjykimit.
E njëjta zgjatje iu dha edhe Zyrës së Prokurorit të Specializuar, ndërsa 27 nëntori 2026 është caktuar si afati deri kur ekipet e Mbrojtjes dhe ZPS-ja duhet t’i dorëzojnë njoftimet e tyre për apel.
Dokumenti për pjesëmarrjen e viktimave konfirmon se më 22 shtator Thaçi, Veseli, Selimi dhe Krasniqi kishin paraqitur bashkërisht kërkesë për zgjatjen e afatit për paraqitjen e njoftimit për apel ndaj Aktgjykimit të shkallës së parë.
Paneli ka miratuar gjithashtu modalitetet për pjesëmarrjen e viktimave gjatë procesit të apelit, duke vendosur që të zbatohet një regjim i ngjashëm me atë të përdorur gjatë gjykimit në shkallën e parë, me përshtatjet e nevojshme për fazën e apelit.
Sipas vendimit, pjesëmarrja e viktimave duhet të kufizohet në çështjet që prekin interesat e tyre personale dhe nuk mund të jetë në kundërshtim apo të cenojë të drejtat e të akuzuarve.
Viktimat do të vazhdojnë të përfaqësohen përmes Mbrojtësit të Viktimave dhe nuk mund të përfaqësojnë vetveten në procedurë. Paneli ka theksuar se do të ruajë kontrollin mbi mënyrën e pjesëmarrjes së tyre gjatë gjithë procesit të apelit.
Mbrojtësi i Viktimave do të vazhdojë të ketë qasje në dosjen e çështjes, përfshirë parashtresat, transkriptet dhe materialet provuese publike, konfidenciale dhe rreptësisht konfidenciale, me përjashtim të materialeve “ex parte” ndaj Mbrojtësit të Viktimave. Ai gjithashtu do të mund të marrë pjesë në seancat e apelit, përveç atyre ku përjashtohet shprehimisht.
Në Aktgjykimin e 16 shtatorit, trupi gjykues kishte evidentuar se 156 viktima kishin marrë pjesë në procedurën gjyqësore.
Platforma qytetare “Liria Ka Emër” ka publikuar oraret dhe pikat e nisjes së autobusëve nga qytete të ndryshme të Kosovës, për qytetarët që do t’i bashkohen protestës së 1 tetorit në Prishtinë.
Protesta do të mbahet në Sheshin “Skënderbeu” në Prishtinë, duke filluar nga ora 16:00, ndërsa autobusët do të nisen në orare të ndryshme nga komunat dhe vendbanimet e Kosovës.
Sipas njoftimit, nisje të organizuara do të ketë nga Prizreni, Suhareka, Vitia, Ferizaj, Podujeva, Kamenica, Vushtrria, Malisheva, Gjakova, Istogu, Kaçaniku, Drenasi, Skenderaj, Klina, Rahoveci, Lipjani dhe qytete e fshatra të tjera.
Deputeti i Partisë Demokratike të Kosovës, Rrustem Mustafa, ka deklaruar se beson se çështja e ligjit për Dhomat e Specializuara mund të kryhet edhe para datës 6 tetor.
“Ne duhet të vazhdojmë procedimin e ligjit për të cilin jemi marrë vesh dhe që tani është në Qeveri, në tavolinën e zotit Kurti. Prioritet në vendin tonë është t’i përgjigjemi sulmit të orkestruar të bllokut të keq mbi mekanizmat dhe institucionet e vendit tonë. Unë e di që mund të bëhet edhe para datës gjashtë, edhe kryeministri po ashtu u shpreh”, deklaroi Mustafa.
Tutje, Mustafa u pyet nëse ka sinjale positive nga kryeministri lidhur me këtë, dhe ai pohoi se ka sinjale pozitive.
Ndër të tjera, Mustafa foli lidhur me një takim që e kishte pasur me kryeministrin Albin Kurti, para datës 16 shtator.
“Komunikimi që kam pasur me zotin Kurti ka qenë para 16 shtatorit. Ka qenë i mirë, gjë që kemi folur për bashkëpunimin institucional mes Partisë Demokratike dhe Vetëvendosjes, dhe unë e di që ka mundësi të shumta”, deklaroi më tej Mustafa në Tëvë1.
Mustafa tha se shpresë i jep miratimi i deklaratës së përbashkët lidhur me aktgjykimin dënues në Hagë.
Artisti Ermal Fejzullahu, gazetari i njohur nga Shqipëria, Alban Dudushi, dhe kantautori Korab Shaqiri do t’u drejtohen sonte qytetarëve në natën e 15-të të protestës “Jo në emrin tim”, në sheshin “Skënderbeu” në Prishtinë.
Sipas programit të publikuar, pjesë e mbrëmjes do të jetë edhe organizatori i protestës, Çlirim Haziri, ndërsa betimin e ushtarit do ta sjellë veterani i UÇK-së, Fazli Muharremi.
Protesta mbahet sonte, më 30 shtator, nga ora 21:00, në vazhdën e kundërshtimit të aktgjykimit të Gjykatës Speciale ndaj ish-krerëve të UÇK-së dhe kërkesave për veprime konkrete institucionale në mbrojtje të tyre.
Kjo mbrëmje i paraprin protestës së paralajmëruar për nesër, më 1 tetor, në orën 16:00, në të njëjtin shesh.
Deputetja e PDK-së, Blerta Deliu-Kodra, i ka bërë thirrje Qeverisë dhe ministres së Drejtësisë, Donika Gërvalla që ta sjellin në Kuvend Projektligjin për Dhomat e Specializuara, duke kërkuar që deklaratat politike të shoqërohen me veprime konkrete.
“I bëj thirrje Qeverisë dhe Gërvallës që të sjell në Kuvend projektligjin për Dhomat e Specializuara”, ka deklaruar Deliu-Kodra në një konferencë për media.
“Qeveria të mos e zvarrisë dhe të mos e quaj agjendë të temave ditore, sepse një ligj i tillë nuk përbën temë ditore”.
Ajo tha se Kuvendi i Kosovës duhet të angazhohet pa dallime partiake për miratimin e një ligji që, sipas saj, do t’u ndihmonte liderëve të UÇK-së dhe Kosovës.
“Ia kemi borxh vendit që të angazhohemi që ta bëjmë një ligj i cili i ndihmon liderëve të UÇK dhe mbi të gjitha e ndihmon Kosovën”.
Deliu-Kodra përmendi edhe deklaratën e përbashkët të partive politike, e cila, sipas saj, ishte mbështetur me 99 vota në Kuvend dhe e cilësonte dënimin si të padrejtë.
“Si Kuvend pa dallim partish ia kemi borxh të bëjmë gjithë angazhimin tonë, Kuvendi ditë më parë ka ditur të jetë i bashkuar me 99 vota mbështetje një deklarate të përbashkët të partive politike që e cilëson dënimin si të padrejtë.”
Ajo kërkoi që deklaratat e Qeverisë të shndërrohen në veprime konkrete.
“Përtej deklaratave që i dëgjojmë nga eksponentë të Qeverisë na duhen veprime konkrete, ato janë kur ky ligj do të sillet në Kuvend. Nga deklarata të kthehen në veprime dhe qëndrime që ne i shohim”.
Deputetja po ashtu tha se situata aktuale nuk duhet të trajtohet si normale.
“Nuk mund të miratohen 35 ligje dhe të simulohet normalitet sepse Kosova sot nuk është në një situatë normale”.
Kryeministri Albin Kurti evidentoi “defekte kapitale” në punën e Gjykatës Speciale në Hagë, e cila në shkallë të parë i dënoi me gjithsej 81 vjet burgim për krime lufte, katër ish-krerët e Ushtrisë Çlirimtare të Kosovës.
Kurti tha se nuk ka pritur drejtësi.
“Nuk mund të them se kam pritur drejtësi, për shkak se asnjëherë s’e kam ndryshuar qëndrimin tim për këtë gjykatë”, tha ai.
Ai numëroi “tri defekte kapitale”.
“I pari është cilësimi ‘ndërmarrje e përbashkët kriminale’. Nuk ka pasur ‘ndërmarrje të përbashkët kriminale’ dhe kjo duhet do e mos të korrigjohet në Apel. E dyta është që ka munguar transparenca dhe ka pasur në njëfarë mënyre absolutisht veçse gjykatë monoetnike […] Dhe i treti natyrisht, ato pasaktësitë faktike dhe historike të cilat i dëgjyam me datën 16 shtator”, tha ai.
Kurti tha se aktgjykimi i plotë ka “mijëra faqe” dhe se dyshon që dikush nga ekipet mbrojtëse ka arritur ta lexojë në tërësi.
“Por të mos harrojmë se atë ditë janë lexuar dhjetëra faqe, por vendimi i plotë është mijëra faqe. Ndoshta është lexuar një përqindje njëshifrore e vendimit të përgjithshëm, në rastin më të mirë. Dhe është çështje javësh besoj kur do të dalë verdikti i plotë dhe unë dyshoj që ndokush edhe prej ekipeve të mbrojtjes ka arritur që deri më tash ta lexojë në plotni e me saktësi të gjithë verdiktin, se është shumë voluminoz”, tha ai.
Kurti tha se Kosova duhet t’i mbrojë së bashku me Shqipërinë ish-krerët e UÇK-së.
“E në mbrojtjen që duhet t’ua bëjmë si shtet e si shoqëri, por unë do të thoja edhe si Shqipëri, sepse ju e dini që gjenocidi i Serbisë në Kosovë nuk ka ndodhur pse thjesht jemi të Kosovës, por për shkak që jemi shqiptarë”, tha ai.
“Dhe ju e patë që në vendimin, në aktgjykimin e Dhomave të Specializuara u përmendën 14 komuna të Kosovës, por u përmendën edhe dy në Shqipëri. Prandaj këtu duhet të jemi bashkë, jo vetëm spektri politik në Kosovë. Bashkë si shtet gjithsesi, bashkë si shoqëri pa dyshim, por edhe bashkë me Shqipërinë. Dhe vetëm në këtë mënyrë, me një strategji të përbashkët shtetërore, me qëllimin e përbashkët fitoren në Apel ne dalim triumfues”, tha Kurti.
Kryeministri tha se “çështja është tejet e rëndësishme, por nuk bën të bëjmë gabime”.
“Nuk na falen më gabimet. Nëse gabon rregullisht, diçka qenësore nuk është në rregull”, tha ai.
Ish-kryeministri, Ramush Haradinaj, ka bërë thirrje për pjesëmarrje në protestën e nesërme në Prishtinë, në mbrojtje të luftës së Ushtrisë Çlirimtare të Kosovës dhe kundër vendimit dënues ndaj udhëheqësve të UÇK-së.
Haradinaj u ka bërë thirrje qytetarëve që t’i bashkohen protestës, e cila do të mbahet nesër në ora 16:00, në sheshin e kryeqytetit.
“Vendimi dënues ndaj udhëheqësve të UÇK-së është i papranueshëm dhe i padrejtë”, ka shkruar Haradinaj.
Ai e ka përmbyllur thirrjen me mesazhin: “Jo në emrin tim, jo në emër të popullit të Kosovës”.
“Duke mbrojtur luftën e drejtë çlirimtare, mbrojmë atdheun”, ka deklaruar Haradinaj.
Kryeministri Albin Kurti ka bërë të ditur se institucionet janë duke shqyrtuar Projektligjin për plotësim-ndryshimin e Ligjit për Dhomat e Specializuara.
Kurti tha se aktualisht janë në pritje të opinioneve ligjore dhe financiare nga Ministria e Drejtësisë dhe Ministria e Financave lidhur me këtë nismë.
Sipas tij, vlerësimet nga institucionet përkatëse pritet të përfundojnë gjatë kësaj jave.
“Po presim opinionin ligjor nga Ministria e Drejtësisë dhe atë financiar nga Ministria e Financave”, ka thënë Kurti.
Ndryshimi i Ligjit për Dhomat e Specializuara është kërkuar në kuadër të diskutimeve për hapat institucionalë pas aktgjykimit të Gjykatës Speciale ndaj ish-krerëve të Ushtrisë Çlirimtare të Kosovës.
Kurti ka thënë se pas marrjes së opinioneve përkatëse do të mund të ketë veprime të mëtejshme institucionale lidhur me këtë çështje.
Kryeministri i Kosovës, Albin Kurti, ka folur në një konferencë për media për çështjen e zgjedhjes së presidentit teksa afrohet 6 tetori.
Ai ka përmendur unitetin e treguar për miratimin deklaratës së Kuvendit të Kosovës për gjyqin e Hagës ndaj ish-krerëve të UÇK-së.
Kreu i LVV’së ka thënë se nuk është punë e mençur që në këtë kohë të shkohet në zgjedhje e të hyhet në rivalitete të ashpëra zgjedhore.
“I kemi gjashtë ditë. Është e domosdoshme të kemi takime të reja. Në njërën anë na duhet strategji për të pandehurit në Hagë dhe në anën tjetër duhet të kemi stabilitet. Nuk besoj që është punë e mençur të hyjmë në rivalitete të ashpëra zgjedhore. Prandaj duhet të ketë takime dhe unë besoj që do të mund të ulemi e diskutojmë dakordësinë e se hënës ta vazhdojmë edhe më tej”, ka thënë Kurti.
Reporteri.net është gazetë online e lajmeve nga vendi dhe bota. Qëllim kryesor ka informimin e drejtë, të paanshëm dhe të shpejtë. Reporteri.net, në pronësi të “R Media L.L.C.”, është themeluar në mars të vitit 2019 dhe drejtohet nga gazetarët Bekim Kabashi dhe Mentor Gjergjaj.
E-Mail: info@reporteri.net
Marketing: marketing@reporteri.net
Adresa: Rr. UÇK, Nr. 102/11 10000 Prishtinë, Kosovë
