Edhe pse KQZ e më pas Gjykata Supreme ia ka ndaluar kandidimin Albin Kurtit në zgjedhjet e 14 shkurtit, anëtarja e Vetëvendosje, Albulena Haxhiu, ka thënë se numri një në fletëvotimin e zgjedhjeve të 14 shkurtit duhet të votohet.

Sipas saj, kjo nuk nënkupton se ajo votë do të humbë.

“Ne i kemi 110 kandidatë sepse nuk i kemi zëvendësuar, as nuk kemi bërë lëvizje të numrave. Fletëvotimi është standard, vetëm numrat pa emra, nuk e di se si do të jetë tek pjesa e numrave të z. Kurtit dhe te unë, por vota për numrin një është votë kundër padrejtësisë që kanë bërë. Unë i inkurajoj njerëzit që të votojnë edhe për numrin një. Nuk cilësohet votë e pavlefshme, e kam kontrolluar edhe rregullën zgjedhore”, ka deklaruar Albulena Haxhiu në “Kallxo Pernime”.

“Vota është edhe një aksion protestues që qytetarët e bëjnë kundër një padrejtësie të madhe. Për mua është me rëndësi që të votohet edhe numri një”, shtoi ajo.