Ish-anëtari i Këshillit të Përgjithshëm të LVV-së, Sami Ahmetaj, iu bashkua sot Aleancës për Ardhmërinë e Kosovës.

Këtë e bëri të ditur lideri i kësaj partie, Ramush Haradinaj, i cili përmes një postimi në rrjetin social Facebook tha se Ahmetaj pas 13 viteve besim në demagogji mashtruese, kaloi nga populizmi në politikë serioze e kombëtare, shkruan Reporteri.net.

Ahmetaj ka dhënë dorëheqje pas 13 vitesh në Vetëvendosje.

Ai ka treguar arsyet se pse ka vendosur të jap dorëheqje nga partia e Albin Kurtit, teksa ka shpërthyer në kritika për këtë të fundit.

Sipas tij janë disa arsye të dorëheqjes, duke e theksuar atë se Albin Kurti nuk i do në parti njerëzit që kanë mendim ndryshe, thotë se ata i margjinalizon në publik.

Ai thotë se problemet me Albin Kurtin kanë filluar që nga viti 2019, kur kishte ndryshuar statutin e partisë që ia lejonte edhe të bëhet kryeministër edhe kryetar i partisë.

Ky është postimi i plotë i Haradinajt:

Jam i lumtur të mirëpres në Aleancë, z.Sami Ahmetaj, ish-kryetar i pikës në Dardani të Pejës dhe anëtar i Këshillit të Përgjithshëm të LVV-së.

Duke cituar fjalët e tij, Samiu pas 13 viteve besim në demagogji mashtruese, sot kaloi nga populizmi në politikë serioze e kombëtare.

Me një Aleancë të fortë në Parlament dhe me mua si President i vendit, ne do të jemi kundërpeshë dhe të sigurojmë stabilitet dhe forcë për ta çuar Kosovën përpara së bashku.

Ashtu si Samiu, gjithnjë e më shumë qytetarë po na mbështesin, duke kuptuar se vendi ynë është në udhëkryq dhe Kosova ka nevojë për vepra të mëdha dhe jo vetëm fjalë të mëdha.

#ForcaeKosovës

RH

/Reporteri.net