Në një llogore me baltë në vijën e frontit në Zolote, në Ukrainën lindore, pjesëtarë të ushtrisë ukrainase i thanë BBC-së se kjo ishte vetëm një ditë tjetër e një lufte të gjatë.

Trupa ushtarake të Ukrainës që nga viti 2014 kanë luftuar kundër separatistëve të mbështetur nga Kremlini. Ata thonë se urdhrat e tyre nuk kanë ndryshuar që kur presidenti Putin njohu dy enklavat separatiste si republika të pavarura, përcjell në shqip Gazeta Online Reporteri.net raportin e BBC-së.

Lëvizja e Putinit mund të lajmërojë ardhjen e trupave ruse në vijën e frontit – të dërguar me pretekstin si “paqeruajtës” për të mbrojtur civilët në zonat e shkëputura.

Ukrainasit thonë se tashmë prej vitesh ka pasur prani ushtarake ruse në vijën e frontit. Ndryshimi është vetëm se tani gjithçka është zyrtare.

“Nëse rusët vijnë, ata nuk do të jenë të motivuar si ne,” i tha BBC-së një ushtar ukrainas, shkruan Reporteri.net. “Ne po mbrojmë Atdheun tonë, kështu që do të qëndrojmë në tokën tonë. Dhe nuk do të jetë si viti 2014 [kur Moska aneksoi Gadishullin e Krimesë]. Tani kemi një ushtri të fortë.”

Gazetarja e BBC-së, Orla Guerin, që po raporton nga vendi i ngjarjes, shpjegon se gjatë qëndrimit të saj të martën në Ukrainën lindore pati granatime, dhe rreth gjysmë ore më vonë trupat ukrainase iu kundërpërgjigjën zjarrit.

Frika është se situata në vijën e frontit mund të përshkallëzohet. Këtu rrezikohet më shumë sesa e ardhmja e Ukrainës. Ka implikime afatgjata për sigurinë në Evropë. /Reporteri.net/.