Iniciativa rajonale e Mini-Shengenit, ku Kosova po refuzon të marrë pjesë, nuk është një iniciativë e re.

Në fakt, një iniciativë e tillë ishte propozuar në vitin 2010 në kuadër të mini-samitit të tretë ballkanik të mbajtur në Prevallë të Prizrenit – takim që ishte thirrur nga presidenti i atëhershëm i Kosovës Fatmir Sejdiu.

Liderët e katër vendeve të rajonit – presidenti i Kosovës Fatmir Sejdiu, ai i Shqipërisë Bamir Topi, i Malit të Zi Filip Vujanoviq dhe ai i Maqedonisë Gjorge Ivanov – kishin shprehur gatishmërinë e tyre për krijimin e një Mini-Shengeni Ballkanik.

Pas takimit të 26 qershorit të vitit 2010, katër presidentët ishin zotuar për bashkëpunim dhe raporte të mira ndërfqinjësore, shkruan Klan Kosova.

Nikoqiri i takimit, presidenti kosovar Fatmir Sejdiu, kishte thënë se temë bosht ishte liria e lëvizjes së qytetarëve dhe mallrave në këtë pjesë të Europës duke e ripërsëritur kërkesën e tij për një Mini-Shengen Ballkanik.

“Sot mund të themi se jemi afër realizimit praktik të asaj që e kemi thënë më herët, të një Mini-Shengeni Ballkanik, apo të Europës Juglindore për të demonstruar pjekurinë tonë edhe për proceset integruese për plan më të gjerë”, kishte deklaruar ai.