Përpjekjet e disa prej miliarderëve të teknologjisë për të ngadalësuar plakjen dhe, në skenarin më ekstrem, për të arritur pavdekësinë mund të jenë fjalë për fjalë një “humbje kohe”.

Kështu mendon fizikani i njohur britanik Jim Al-Khalili, profesor i fizikës teorike, i cili argumenton se obsesioni me zgjatjen e pafundme të jetës mund t’i bëjë njerëzit të humbasin pikërisht atë që po përpiqen të fitojnë,  kohën që kanë në dispozicion tani.

Duke folur për The Guardian, Al-Khalili tha se studimi i natyrës së kohës e ka bërë të mendojë gjithnjë e më shumë për rëndësinë e mënyrës se si e shfrytëzojmë jetën, përcjell Reporteri.net.

“Ne kemi një interval të kufizuar kohe gjatë të cilit ekzistojmë në univers”, tha ai.

Sipas tij, jeta e njeriut është vetëm një çast krahasuar me moshën e universit dhe shpenzimi i këtij intervali duke u përpjekur vazhdimisht për ta zgjatur atë mund të mos jetë mënyra më e mirë për ta përdorur.

Miliarderët po investojnë në luftën kundër plakjes

Komentet e Al-Khalilit vijnë në një periudhë kur disa nga njerëzit më të pasur në industrinë e teknologjisë po investojnë para dhe energji të konsiderueshme në metoda që synojnë ngadalësimin e plakjes dhe zgjatjen e jetëgjatësisë.

Një nga shembujt më të njohur është sipërmarrësi teknologjik Bryan Johnson, i cili është bërë i famshëm për regjimin e tij ekstrem të monitorimit të organizmit dhe përpjekjet për të reduktuar biologjikisht efektet e plakjes.

Johnson kishte provuar madje transfuzione plazme nga djali i tij 17-vjeçar, megjithëse më vonë deklaroi se nuk kishte parë ndonjë përfitim nga kjo procedurë.

Ndërkohë, edhe njerëz të zakonshëm po eksperimentojnë me metoda të ndryshme kundër plakjes, nga zhytja në ujë të ftohtë dhe suplementet deri te injeksionet e parregulluara me peptide.

Fizikani që studion misterin e kohës

Al-Khalili do të jetë këtë vit ligjëruesi i Royal Institution Christmas Lectures, ku tema kryesore do të jetë pikërisht koha.

Ai synon të shpjegojë disa nga paradokset më të mëdha të fizikës, përfshirë faktin se koha nuk kalon me të njëjtën shpejtësi për të gjithë.

Sipas teorisë së relativitetit të Albert Einsteinit, shpejtësia dhe graviteti ndikojnë në mënyrën se si kalon koha. Një person që udhëton me shpejtësi jashtëzakonisht të madhe mund ta përjetojë kohën ndryshe nga dikush që qëndron në Tokë.

Graviteti gjithashtu mund ta ngadalësojë kohën.

Kjo ide është përdorur edhe në filmin Interstellar, ku personazhet kalojnë një periudhë pranë një vrime të zezë supermasive, ndërsa në Tokë kalojnë shumë vite.

A është i mundur udhëtimi në kohë?

Al-Khalili thotë se matematika e relativitetit lejon, në kushte të caktuara teorike, trajektore që mund të çojnë drejt së kaluarës.

Problemi është se një udhëtim i tillë do të krijonte paradokse të mëdha dhe shumica e fizikanëve dyshojnë se natyra e lejon realisht.

Udhëtimi drejt së ardhmes është më pak problematik nga pikëpamja teorike. Koha mund të ngadalësohet duke udhëtuar pranë shpejtësisë së dritës ose duke qëndruar në një fushë gravitacionale jashtëzakonisht të fuqishme.

Misteri: Pse koha ecën vetëm përpara?

Një nga problemet që Al-Khalili do të trajtojë është ajo që në fizikë njihet si “shigjeta e kohës”.

Në jetën e përditshme gjithçka duket se ecën vetëm në një drejtim: njerëzit plaken, bateritë harxhohen, objektet prishen dhe sistemet bëhen gjithnjë e më të çrregullta.

Megjithatë, ekuacionet themelore të fizikës në shumë raste nuk përcaktojnë një drejtim të privilegjuar të kohës.

Al-Khalili thotë se kjo pyetje e ka munduar prej vitesh dhe pretendon se tashmë ka një shpjegim për të.

Ai ka paralajmëruar se zgjidhjen e tij do ta prezantojë gjatë ligjëratave të Krishtlindjeve të Royal Institution, të cilat do të transmetohen nga BBC në fund të dhjetorit.

Deri atëherë, mesazhi i tij për njerëzit që ëndërrojnë pavdekësinë është shumë më i thjeshtë: në vend që gjithë jetën ta kalojmë duke u përpjekur ta zgjasim atë, mund të ketë më shumë kuptim të shfrytëzojmë sa më mirë kohën që kemi.