Instituti Kombëtar i Shëndetësisë Publike të Kosovës (IKShPK) ka njoftuar se vaksinat kundër gripit sezonal për sezonin 2026/2027 pritet të arrijnë në Kosovë më 21 tetor 2026.

Sipas IKShPK-së, vonesa në furnizim është shkaktuar nga ndryshimet në përbërjen e shtameve të rekomanduara për vaksinën e hemisferës veriore, të cilat kanë ndikuar në procesin ndërkombëtar të prodhimit dhe furnizimit.

“Instituti Kombëtar i Shëndetësisë Publike të Kosovës njofton qytetarët se vaksinat kundër gripit sezonal për sezonin 2026/2027 pritet të arrijnë në Republikën e Kosovës më 21 tetor 2026”, thuhet në njoftim.

IKShPK ka bërë të ditur se këtë vit procesi i prodhimit të vaksinave është ndikuar nga ndryshimet në përbërjen e shtameve të rekomanduara për vaksinën e hemisferës veriore.

“Këtë vit, procesi ndërkombëtar i prodhimit të vaksinave kundër gripit është ndikuar nga ndryshimet në përbërjen e shtameve të rekomanduara për vaksinën e hemisferës veriore. Këto ndryshime kanë ndikuar në afatet e prodhimit dhe furnizimit në nivel global, si dhe në furnizimin e vendeve të rajonit, përfshirë Republikën e Kosovës, ku vaksinat pritet të arrijnë me 21 ditë vonesë nga afati i planifikuar”, thuhet në njoftim.

Instituti ka bërë të ditur se po e përcjell nga afër procesin e furnizimit dhe se pas pranimit të vaksinave do të njoftojë qytetarët dhe institucionet shëndetësore për fillimin e vaksinimit.

“IKShPK po përcjell nga afër procesin e furnizimit dhe, pas pranimit të vaksinave, do të njoftojë qytetarët dhe institucionet shëndetësore për fillimin e vaksinimit kundër gripit sezonal”, thuhet më tej.

Qytetarët do të informohen në kohë edhe për vendet dhe oraret ku do të mund të vaksinohen, pasi të përfundojnë procedurat e pranimit dhe shpërndarjes së vaksinave në institucionet shëndetësore.

“Qytetarët do të informohen në kohë për vendet dhe oraret e vaksinimit, pas përfundimit të procedurave të pranimit dhe shpërndarjes së vaksinave në institucionet shëndetësore”, ka njoftuar IKShPK.

Instituti ka falënderuar qytetarët për mirëkuptimin dhe bashkëpunimin.