Për herë të parë pas largimit nga pozita e ministrit të Shëndetësisë Rifat Latifi, erdhi në Kosovë.

Arsyeja e parë ishte shënimi i katërvjetorit të Kolegjit të Kirurgëve të Kosovës, ku ai është kryetar. E dyta, promovimi i një reviste dedikuar kirurgjisë.

Ish-ministri Latifi theksoi se nuk do të heqë kurrë dorë nga Kosova.

“Unë s’kam heq dorë nga Kosova dhe s’kam me heq kurrë dorë”, ka deklaruar ish-ministri.

Ai tha se kontributi i tij për shëndetësinë kosovare do të jetë edhe më i madh sesa kur ishte nën petkun e ministrit.

“Kur je në atë kafazin politik, pavarësisht ku je, është ndryshe sesa kur je qytetar i lirë dhe ekspert i lirë. Tash unë jam qytetar i lirë, muj me punu shumë ma shumë për shëndetësinë e Kosovës, nga pozita ku jam tash”, tha Latifi.

Latifi bëri me dije se nuk ka hatërmbetje me ish-eprorin e tij, kryeministrin Albin Kurtin, teksa potencoi se edhe në revistën e botuar e ka falënderuar atë për mundësinë që i kishte dhënë.

“Absolutisht jo. Nëse ju merrni këtë, unë e kam falenderu kryeministrin”, deklaroi Latifi.

Megjithëkëtë, shton se nuk e kishte pritur epilogun e tetorit, muajin kur dha dorëheqje nga pozita e ministrit.

Profesori i kirurgjisë që jeton në Amerikë beson se ishte i përkushtuar në përgjegjësitë e tij gjatë kohës sa ishte ministër./Klan Kosova