Për vite me radhë, makinat kineze mbanin etiketën e produkteve me kosto të ulët që nuk mund të rivalizonin seriozisht markat evropiane dhe japoneze. Megjithatë, ky perceptim po ndryshon me shpejtësi, veçanërisht në sektorin e automjeteve elektrike.

Prodhuesit kinezë sot nuk po fitojnë terren vetëm me çmime të ulëta, por me një organizim prodhimi krejtësisht ndryshe nga ai i gjigantëve tradicionalë të automobilizmit.

Këtë e kanë vërtetuar ekspertët japonezë pasi zbërthyen në detaje modelin elektrik BYD Atto 3, me synimin për të kuptuar se si ky prodhues arrin të ofrojë një automjet me çmim dukshëm më konkurrues në treg.

Çmimi nuk është rastësi: Prodhimi i baterisë brenda kompanisë
Ndryshe nga supozimet se automjetet kineze janë më të lira vetëm për shkak të fuqisë punëtore me kosto të ulët, analiza e modelit BYD tregoi një realitet tjetër.

Përparësia kryesore e gjigantit BYD qëndron te fakti se pjesën më të madhe të komponentëve kryesorë i prodhon vetë. Kjo bën që kompania të mos varet nga një zinxhir i gjatë furnitorësh, siç ndodh rëndom me prodhuesit evropianë dhe japonezë.

Tek makinat elektrike, ky element është vendimtar pasi bateria është pjesa më e shtrenjtë e automjetit. Duke e zhvilluar dhe prodhuar vetë baterinë, kompania ka kontroll të plotë mbi çmimin, cilësinë dhe ritmin e prodhimit.

Më pak ndërmjetës, më shumë kontroll
Industria tradicionale e automobilave ka funksionuar prej dekadash përmes një rrjeti të gjerë furnizuesish: një kompani prodhon pjesët elektronike, një tjetër bateritë, një e tretë pjesët e brendshme dhe mekanike. Çdo hallkë shton kosto logjistike, afate kohore dhe marzhe fitimi.

Për dallim nga kjo skemë, BYD e ka përqendruar procesin në duart e veta. Ky sistem mundëson:

Marrje më të shpejtë të vendimeve

Përshtatje më të lehtë të linjave të prodhimit

Ulje të kostove shtesë që grumbullohen përgjatë zinxhirit të furnizimit

Zgjidhja teknike që befasoi inxhinierët japonezë
Një nga detajet që tërhoqi vëmendje të veçantë gjatë analizës ishte mënyra se si BYD bashkon disa sisteme kyçe në një njësi të vetme lëvizëse. Në vend të shumë komponentëve të ndarë, pjesët janë integruar duke krijuar një strukturë më të thjeshtë të automjetit.

Kjo zgjidhje nënkupton më pak pjesë, montim dukshëm më pak të komplikuar dhe shpenzime më të ulëta prodhimi, çka përkthehet drejtpërdrejt në një çmim më të volitshëm për blerësin final.

Për prodhuesit japonezë, të njohur historikisht për efikasitet dhe besueshmëri, kjo analizë shërben si një sinjal i qartë se rregullat e lojës në tregun global të automobilave po ndryshojnë me shpejtësi.