Ndonëse në numër jo shumë të madh, banorë të lagjes “Mati’’ të Prishtinës, u mblodhën për të protestuar.
Nën përcjellje edhe të policisë, banorët thanë se qëllimi kryesor i protestës së tyre është që komuna të marrë masa ndaj automjeteve të rënda që kalojnë nëpër rrugën kryesore, raporton KTV.
Sipas banorëve të këtushëm, qarkullimi i kamionëve në këtë pjesë shpeshherë ka dëmtuar edhe pronat private gjë që për ta kjo është e papranueshme.
Banorë të tjerë të lagjss insistojnë se qarkullimi i kamionëve në këtë pjesë duhet të ndalohet, derisa shtojnë se ekziston edhe rreziku i ndonjë aksidenti.
Për ankesat e tyre ata thonë se kanë dërguar kërkesa edhe në Komunën e Prishtinës, porse nuk janë marrë parasysh, derisa lagjia është lënë pas dore nga pushteti komunal.
Ndonëse pa përkrahjen e shumicës së banorëve përreth, ata thanë se kërkesat e tyre do të vazhdojnë t’i adresojnë në komunë.