Veliu telefonin komandant Risin, KFOR-i gatshëm të ndihmojë Kosovën pas situatës me koronavirusin

Ministri i Punës së Brendshme dhe Administratës Publike, Agim Veliu të shtunën ka zhvilluar një bisedë telefonike me komandantin e KFOR-it në Kosovë, gjeneral-majorin Michel Risi dhe fokus i bisedës së tyre ka qenë gjendja pas konfirmimeve të rasteve të para të prekura me koronavirus, është bërë e ditur nga zyra e Ministrit të Brendshëm.


Në njoftimin e lëshuar prej kësaj zyre shkruan se Risi e ka njoftuar Veliun se KFOR-i i ka ndërmarrë të gjitha masat e duhura për parandalimin e përhapjes së këtij virusi, tek ushtarët dhe personeli dhe se me kujdes po e përcjellin situatën.

“Ministri Veliu e falënderoi komandantin e KFOR-it Gjenarl Major Michele Risi, për masat që i ka ndërmarrë duke respektuar vendimet e institucioneve të Kosovës për masat parandaluese të Corona Virus COVID-19”, shkruan në njoftim.

Sipas njoftimit, dy bashkëbiseduesit janë dakorduar për bashkërendim aktivitetesh midis institucioneve të sigurisë së Kosovës me trupat e KFOR-it në Kosovë, me qëllim të menaxhimit të gjendjes së krijuar.

“Komandanti i KFOR-it, gjithashtu shprehu gatishmërinë që trupat e KFOR-it janë në dispozicion dhe gjendje gatishmërie për t’u dalë në ndihmë popullit të Kosovës”, shkruan në njoftim.