Kandidati i Lidhjes Demokratike të Kosovës (LDK) për kryeministër, Avdullah Hoti, gjatë një takimi me elektoratin nga Lugu i Baranit në Pejë, ka thënë të dielën se “përderisa ne po krenohemi me të kaluarën tonë shtetformuese, oponentët tanë politikë po e fshijnë të kaluarën sepse po turpërohen nga të bëmat e tyre kundër shtetit dhe interesave të qytetarët”.

Hoti tha se kundërshtarët politikë gjithmonë kanë qenë në anën e kundërt të historisë së shtetit dhe demokracisë së Kosovës.

“Ata gjithmonë kanë qenë në anën e kundërt të historisë së shtetit dhe demokracisë së Kosovës. Ne krenohemi me historinë tonë politike. Krenohemi me Presidentin Rugova dhe rrugëtimin e tij që po e ndjekim edhe sot, ndërsa oponentët tanë kanë qenë në anën e kundërt të Rugovës dhe të shtetit të Kosovës. Sot kanë angazhuar me dhjetëra IT për t’i fshehur nga publiku deklaratat e tyre kundër demokracisë dhe kundër procese që sollën formimin e shtetit të Kosovës”, tha Hoti.

Sipas tij, qytetarët e Kosovës e njohin më së miri për gjithë kontributin që kanë dhënë secili, duke filluar nga rezistenca paqësore, lufta për liri, rindërtimi nga lufta dhe procesi i krijimit të shtetit.

Ai tha se vetëm Lidhja Demokratike e Kosovës i ka të hapura dyert në të gjitha kancelaritë e botës.