Ekzistojnë disa teori nëse duhet pastruar para ose pas gjumit, por kjo dallon edhe nga preferencat. Disa persona zgjedhin të pastrohen sapo të jenë zgjuar, pasi kjo ndikon në zgjimin e plotë dhe në rritjen e energjisë për gjatë ditës.

Sipas Healthline, një dush i freskët në mëngjes bën që të jeni gati për një ditë të gjatë. Uji stimulon qarkullimin e gjakut, duke nxitur organizmin që të zgjohet plotësisht. Gjithashtu, pastrimi i hershëm pastron lëkurën dhe heq yndyrën që grumbullohet gjatë natës.

Sipas disa studimeve, dushi në mëngjes mund të nxisë kreativitetin dhe zgjidhjen e problemeve, pasi truri konsiderohet se është i freskët dhe i relaksuar.

Mirëpo, edhe dushi para gjumit i ka benefitet e veta.

Ai ndikon në cilësinë e gjumit, duke ulur temperaturën e trupit dhe duke çuar sinjale se është koha për të fjetur. Kjo mund të bëjë që trupi të përjetojë gjumë të thellë dhe të qetë. Derisa gjatë ditës trupi u ekspozohet papastërtive, dushi në mbrëmje pastron trupin dhe i largon ndotësit, duke ulur rrezikun nga irritimet ose alergjitë.

Një dush i ngrohtë po ashtu relakson muskujt dhe redukton stresin.

Pra, dushi para ose pas gjumit mbetet preferencë personale, por padyshim se të dy këto kanë benefite.