Shefi i grupit parlamentar të PDK-së, Abelard Tahiri ka thënë se raporti i Departamentit Amerikan të Shtetit ka vërtetuar atë që ata si parti e thonë, se në qeverinë Kurti ka korrupsion serioz, shkruan gazeta online Reporteri.net.

Tahiri ka thënë se Partia Demokratike e Kosovës tash e sa kohë ka ngritur shqetësimin për skandalet e kësaj qeverie.

“Raporti i Departamentit Amerikan të Shtetit e vërtetoi atë që jemi duke e thënë vazhdimisht ne si Parti Demokratike – në Qeverinë Kurti ka korrupsion serioz qeveritar.
Tash e sa kohë, ne e kemi ngritur problemin e shumë skandaleve të korrupsionit të Qeverisë Kurti – prej skandalit të rezervave shtetërore e deri te kontratat njëburimore në vlerë prej mbi 200 milion eurove”, ka shkruar Tahiri në Facebook.

Sipas tij, partia në pushtetit vazhdimisht ka refuzuar kërkesat e kësaj partie për themelimin e komisioneve hetimore, e që sipas tij kjo i shton edhe më shumë dyshimet për këto, siç i quan ai skandale të kësaj qeverie.

“Fakti që Vetëvendosja në vazhdimësi ka refuzuar kërkesat tona për themelimin e komisioneve hetimore parlamentare, i shtonte dyshimet se sa thellë ishin zhytur në këto skandale. Tani, raporti i Departamentit të Shtetit vetëm se i vërtetoi këto dyshime”, shkroi shefi i grupit parlamentar të PDK-së në Facebook./Reporteri.net/

Korrupsion serioz i qeverisë dhe probleme me pavarësinë e gjyqësorit, këto janë gjetjet e raportit të Departamentit të Shtetit për Kosovën