Google ka njoftuar lansimin e një veçorie të re që u jep përdoruesve mundësinë të ndryshojnë adresën e tyre të Gmail-it pa rrezikuar humbjen e informacionit të grumbulluar ndër vite. Deri më sot, adresa e email-it konsiderohej e pandryshueshme, ndaj kush dëshironte një përdorues të ri detyrohej të hapte llogari tjetër, me gjithë vështirësitë e transferimit të të dhënave.

Me këtë përditësim, emailet, kontaktet, skedarët në Google Drive, historiku i inbox-it dhe çdo element i lidhur me llogarinë do të mbeten plotësisht funksionale. Google garanton se do të ruhen gjithashtu abonimet, cilësimet e sigurisë, konfigurimet personale dhe shërbimet e tjera që përdoruesi ka aktivizuar.

Ekspertët e teknologjisë e vlerësojnë këtë risi si një kthesë të rëndësishme drejt fleksibilitetit dhe identitetit digjital më të personalizuar. Nga kjo pritet të përfitojnë veçanërisht profesionistët, bizneset dhe krijuesit e përmbajtjes, të cilët shpesh kanë nevojë të përshtatin adresën e email-it me profilin e tyre aktual, pa humbur gjurmët e komunikimeve të mëparshme.