Ka nisur sot në Kuvend takimi mes kryeministrit të Kosovës, Albin Kurti, dhe kryetarit të Lidhjes Demokratike të Kosovës, Lumir Abdixhiku, në kuadër të përpjekjeve për arritjen e një marrëveshjeje për zgjedhjen e presidentit të ri dhe shmangien e zgjedhjeve të parakohshme.

Para nisjes së takimit, Kurti nuk u deklarua për mediat.

“Tash duhet të fillojmë takimin dhe pastaj shohim.”, tha ai shkurt.

As kreu i LDK nuk ka folur për mediat para takimit.

Mbrëmjen e së dielës, më 22 shkurt, kryeministri zhvilloi gjithashtu një takim me kreun e Partisë Demokratike të Kosovës, Bedri Hamza. Ky i fundit deklaroi se partia që ai drejton nuk ka qenë dhe nuk do të jetë pengesë për proceset shtetërore.

Sipas afateve kushtetuese, Kosova duhet të zgjedhë presidentin e ri deri më 4 mars, pasi mandati i presidentes aktuale, Vjosa Osmani, i përfundon në fillim të prillit.