Kreu i Aleancës Kosova e Re, Behgjet Pacolli, ka vazhduar investimet në pasuri të paluajtshme. Vetëm vitin e kaluar, Pacolli ka investuar mbi 2.6  milionë euro në blerjen e tri tokave, një banese, dy lokaleve dhe ndërtimin e dy shtëpive, shkruan Gazeta Online Reporteri.net.

Shtëpia 5 milionëshe që e ka jashtë vendit, duket se nuk i ka mjaftuar deputetit Behgjet Pacolli. Vjet, ai ka vendosur t’i ndërtojë edhe dy të tjera, si dhe ta blejë një banesë.

Njëra i ka kushtuar gati gjysmë milioni euro, që është me sipërfaqe 1143 metra katrorë, e tjetra 380 mijë euro, e që është 994 metër katrorë. Banesa i ka kushtuar më lirë, apo 211 mijë e 838 euro, e që është 214 metër katrorë.

Në regjistrin e deklarimit të pasurisë në Agjencinë për Parandalimin e Korrupsionit, Pacolli ka thënë se te dyja shtëpitë i ka ndërtuar me mjete nga kursimet, e poashtu edhe banesën.

Përveç shtëpive e banesës, Pacolli ka investuar edhe në toka e lokale. Një lokal e ka blerë 450 mijë euro, e tjetrin 409 mijë e 548 euro.

Mbi gjysmë milioni euro tjera, Pacolli i ka shpenzuar për blerjen e një toke. Një prej tokave figuron se është blerë për 547 mijë e 560 euro. Dy tokat tjera, kushtojnë njëra 144 mijë e 120 euro, e tjetra 71 mijë e 640 euro.

Pacolli është pronar edhe i 49 tokave të tjera, e gjashtë lokaleve. Ai ka edhe një banesë tjetër, dhe është pronar i një objekti afarist, në vlerë prej 42 milionë euro.

Përveç pasurive të paluajtshme, ai është edhe pronar i tetë veturave, katër prej të cilave janë Mercedez-Benz.

Ndërkohë, është edhe aksionar në 28 shoqëri tregtare, ku ka aksione në vlerë qindra miliona euro.

Vlera e parave të gatshme që posedon nëpër banka, shkon në mbi 2 milionë, derisa po kaq figuron se ka kredi të kompanisë.

Tek të hyrat vjetore, Pacollit i figuron vetëm paga që merr nga Kuvendi i Kosovës si deputet, në vlerë prej rreth 19 mijë euro.