Autor: Linda Ibrahimaj
Zëvendës Ndihmës Sekretari i Shtetit dhe i dërguari i posaçëm i SHBA për Ballkanin Perëndimor, Gabriel Escobar pasditen e së enjtes, në ora 18:00 do të takojë përfaqësuesit e opozitës në Prishtinë.
Kjo darkë e shtruar nga Escobar për opozitën, siç merr vesh Gazeta Online Reporteri.net do të mbahet në rezidencën e ambasadorit amerikan në Prishtinë, Jeffrey Hovenier në ora 18:00.
Pjesëmarrjen në këtë darkë në ambasadën amerikane e ka konfirmuar për Reporteri.net, nënkryetari i parë i AAK-së, Ardian Gjini, duke qenë se kryetari kësaj partie, Ramush Haradinaj ndodhet jashtë vendit.
“Po unë do të jem pjesë e këtij takimi me Escobar”, tha Gjini.
Poashtu, pjesë e këtij takimi do jenë edhe përfaqësues të PDK-së dhe LDK-së. Gazeta Online Reporteri.net merr vesh se radhët e PDK-së, do jetë Kryetari i kësaj partie, Memli Krasniqi.
Zëdhënësja e LDK-së, Sibel Halimi konfirmoi për Reporteri.net se do jetë kryetari Lumir Abdixhiku ai i cili do të jetë sonte në darkën nga Escobar.
I dërguari i posaçëm i DASH-it për Ballkanin Perëndimor, Gabriel Escobar të premten pritet të takohet edhe me presidenten e vendit, Vjosa Osmani dhe Kryeministrin Albin Kurti.
Takimi i Osmanit dhe Escobar u konfirmua sot gjatë ditës për Gazetën Online Reporteri.net, nga Këshilltari i presidentes Vjosa Osmani, Bekim Kupina, e poashtu edhe Përparim Kryeziu, zëdhënës i Qeverisë së Kosovës, konfirmoi se Kurti do të pres në takim emisarin amerikan.
Ndryshe, Escobar dje dhe sot qëndroi në Serbi, ku paraditen e së enjtes në konferencë për media foli edhe për takimin e 18 marsit në Ohër, teksa tha se nuk pret marrëveshje, por që ajo përfundimtare do të ndodhë brenda vitit.
I dërguari i posaçëm për Ballkanin Perëndimor tha se marrëveshja që tashmë ndodhet në tavolinë është një nga mundësitë më të mira për të çuar rajonin përpara.
Ndërsa, fakt si fakt të kryer e cilësoi formimin e Asociacionit të komunave me shumicë serbe, duke thënë se asociacioni do të bëhet, por çështja është se sa shpejt do të ndodhë kjo dhe cili model do të aplikohet./Reporteri.net/
Escobar: Në Ohër nuk pres të ketë nënshkrime, marrëveshja përfundimtare e mundshme këtë vit