Fati i Brexit është “në duart e miqve tanë britanikë”, është shprehur Donald Tusk. Deklarata e tij erdhi pasi krerët e BE ranë dakort për shtyrjen e Brexit me dy javë.
Nëse deputetët miratojnë marrëveshjen e tërheqjes së Theresa May javën e ardhshme, Brexit do të shtyhet nga 29 marsi deri më 22 maj.
Por nëse nuk e bëjnë këtë, Mbretëria e Bashkuar deri më 12 prill do të duhet të dalë me një plan të ri.
Presidenti i Këshillit Europian, Tusk tha se deri më 12 prill, “çdo gjë është e mundur” duke përfshirë një vonesë shumë më të gjatë ose anulimin e Brexit.
Duke folur nga Brukseli, Tusk tha se është i lumtur që 27 udhëheqësit e BE arritën një vendim unanim për zgjatjen e procesit dy-vjeçar të nenit 50, sipas të cilit Mbretëria e Bashkuar do të duhej të largohej nga BE të premten e ardhshme.
“Kjo do të thotë se deri më 12 prill çdo gjë është e mundur. Mund të ketë një marrëveshje, një zgjatje nëse Britania vendos të rishqyrtojë strategjinë e saj, ose të revokojë nenin 50, që është një e drejtë e posaçme e qeverisë britanike,”-tha ai. “Fati i Brexit është në duart e miqve tanë britanikë. Si BE, jemi të përgatitur për më të keqen, por shpresojmë për më të mirën. Siç e dini, shpresa mbaron të fundit”, tha Tusk, transmeton Reporteri.net