Kryeministri Avdullah Hoti, ka thënë se aktualisht koalicioni qeverisës është duke funksionuar.

Sa i përket deklaratës së Kryetrarit të LDK-së, Isa Mustafa, se ky subjekt – më i madhi i Qeverisë, ka hequr vijat e kuqe me PDK-në, Hoti është shprehur se duhet të pyetet vet ai.

“Koalicioni po funksioni, Qeveria është stabile”, ka thënë Hoti.

“Për aq kohë sa Qeveria është stabile nuk shoh mundësinë e hyrjes në kombinime të tjera”, ka shtuar ai, në pyetjen nëse kanë bërë gati ftesën për PDK-në që të përfshihet në Qeveri.

Kurse për çështjen e riemërimit të Liqenit të Ujmanit në “Liqeni Trump”, ai ka shtuar se Kosova ka shprehur vullnetin e saj që kjo të ndodhë pas propozimit të Dërguarit të SHBA-së për dialog, Richard Grenell.

“Ka qenë kërkesë në Shtëpinë e Bardhë, edhe në takimin këtu nga Ambasadori Grenell që në shenjë respekti për angazhimin e Trump, ky liqe të emërohet “Liqeni Trump”.

“Është shprehje e vullnetit të mirë që ne ta marrim parasysh për angazhimin e Presidentit Trump në procesin e dialogut”.