Zyra gjermane për Punët e Jashtme ka komentuar takimin që ka pasur ministrja e Jashtme, Analena Baerbok me kryeministrin e Kosovës, Albin Kurti.

“Vetëm tri javë para takimit të Komitetit të Ministrave në Strasburg. Baerbok diskutoi me Kurtin në margjinat e Petersberg24 se si të mundësohet rruga e Kosovës për anëtarësim në Këshillin e Evropës”, ka shkruar Zyra Gjermane për Punë të jashtme në rrjetin social “X”.

Kryeministri i Kosovës, Albin Kurti nëpërmjet rrjetit social Facebook, ka folur për vizitën e tij në Gjermani.

Ai ka shkruar se në vitin kur Këshilli i Evropës i mbush 75 vjet nga themelimi i saj, në këtë përvjetor ajo duhet të zgjerohet dhe me Kosovën si anëtare të 47-të, transmeton gazeta online Reporteri.net.

“Ne duam të kontribojmë dhe pasurojmë vlerat e parimet demokratike të kësaj organizate. Anëtarësimi ynë, përbën dhe hapin e parë drejt bashkimit tonë me familjen evropiane”, ka shkruar Kurti.

Ai ka shtuar se regjimet autoritare e jo-demokratike janë përjashtuar ose po kërcënojnë me largim nga Këshilli i Evropës, ndërsa Kosova po kërkon me meritë anëtarësimin në këtë organizatë që mbron e promovon pikërisht të drejtat e njeriut, sundimin e ligjit dhe demokracinë.

“Fuqizimi i marrëdhënieve me partnerët e aleatët tanë gjermanë është përherë i domosdoshëm e mban gjithmonë një vend të veçantë në politikën tonë të jashtme”, ka shkruar ai.

Kurti ka thënë se dy ditë kanë qenë të mbushura me takime.

“Kryefjala e vizitës sonë ishte rëndësia e anëtarësimit të Kosovës në Këshillin e Evropës, për të cilën bëmë thirrje për mbështetje të mëtejme nga aleatët tanë gjermanë”, ka shkruar ai.

Ai ka takuar Ministren e Jashtme, Annalena Baerbock, Ministrin për Ushqim dhe Bujqësi, Cem Oezdemir, bashkë-drejtuesin e SPD-së gjermane, Lars Klingbeil, e dhjetëra deputetë të Parlamentit gjerman nga radhët e Partisë Socialdemokrate (SPD), Bashkimit Demokristian (CDU), Partisë së Gjelbër (Grune) dhe Partisë së Lirë Demokratike (FDP).

“Morëm pjesë në ngjarjen e organizuar nga grupi parlamentar i SPD-së në shënimin e 75 vjetorit të themelimit të Këshillit të Evropës dhe në bashkëbisedimin e organizuar nga Fondacioni Bertelsmann, ku në mesin e të pranishmëve ishin drejtuesi i Iniciativës së Stabilitetit Evropian (ESI), Gerald Knaus dhe drejtorja ekzekutive e fondacionit, Daniela Schwarzer”, ka shkruar ai.

Just under three weeks to go until the #CoE Committee of Ministers in Strasbourg. @ABaerbock discussed with @AlbinKurti on the sidelines of #petersberg24 how to pave the way for #Kosovo|’s @CoE membership. pic.twitter.com/JkzQPSPvTY

— GermanForeignOffice (@GermanyDiplo) April 26, 2024