Këshilltarë të Presidentes Osmani kanë marrë pjesë në inaugurimin e presidentit të ri të Republikës së Panamasë, përcjell Reporteri.net.

“Në emër të Presidentes Vjosa Osmani Sadriu, delegacioni i përbërë nga znj. Donika Kadaj Bujupi, Gjenerali Sefer Isufi, të shoqëruar nga Ambasadorja Heroina Telaku, kanë marrë pjesë në inaugurimin e Presidentit të Republikës së Panamasë, z. Jose Raul Mulino Quintero.
Gjatë kësaj vizite, anëtarët e delegacionit ia përcollën urimet e Presidentes Osmani për presidentin Quintero, duke i dëshiruar sukses në detyrë”, thuhet në njoftimin e Presidencës.

Në takimet e mbajtura, theksohet në kumtesë, u konfirmua angazhimi i Kosovës për forcimin e aleancave me shtetet e kësaj pjese të botës, në interesin shtetëror të Republikës së Kosovës.

“Delegacioni u takua edhe me shumë përfaqësues të shteteve të tjera prezente, nga SHBA-të e deri tek shtete nga Amerika Qendrore, Jugore, si dhe nga Afrika”, përfundon njoftimi.