Ylli kosovar i Werder Bremenit është bërë objektiv i klubeve të njohura evropiane. Atë e duan në Gjermani, në Angli dhe në Itali.
Milot Rashica vazhdon të ndiqet nga klubet e njohura evropiane, shkruan Gazeta Express.
Ylli kosovar bëri paraqitje të shkëlqyeshme me Werder Bremenin në dy sezonet e fundit dhe kjo ka bërë që të bëhet objektiv i klubeve të mëdha.
Sipas mediave italiane, së fundmi interesim për përfaqësuesin kosovar ka shfaqur Napoli.
Klubi nga Serie A do ta rivalizojë Lazion, e cila po ashtu e pëlqen futbollistin ofanziv.
Ndërkohë, Rashicën në Angli e duan Liverpooli dhe Aston Villa.
Kurse, në Gjermani e pëlqejnë Borussia Dortmundi dhe Leipzigu.
Rashica i ka realizuar 10 gola këtë sezon deri tash me Werder Bremenin, prej tyre 7 në Bundesligë.
Në total, ish-futbollisti i Vitesses i ka realizuar 23 gola në 59 paraqitje me Werderin.
Nga viti 2016, 23 vjeçari është pjesë e Përfaqësueses së Kosovës, me të cilën i ka zhvilluar 27 ndeshje dhe i ka realizuar 4 gola.
Vlera e kartonit të Rashicës është 38 milionë euro, ndërsa ai ka kontratë me klubin gjerman deri në vitin 2022.
Por, nëse Werderi bie nga Bundesliga, klubet e interesuara mund ta blejnë futbollistin vushtrrias për 18 milionë euro.
Rashica është i gatshëm për një klub më të madh.
Ai dëshiron të luajë rregullisht në Ligën e Kampionëve dhe përkrah yjeve të futbollit.