Kreu i Lidhjes Demokratike të Kosovës, Lumir Abdixhiku, po vazhdon qëndrimin e tij në Shtetet e Bashkuara të Amerikës.
Përmes një njoftimi, Abdixhiku ka treguar se të mërkurën është pritur në Senatin e ShBA’së, nga Senatori Christopher Murphy, transmeton Gazeta Online Reporteri.net.
Në këtë takim u fol për zhvillimet e fundit në vend si dhe për thellimin e bashkëpunimit mes Kosovës dhe ShBA’ve përmes ‘Kartës për Partneritet Strategjik’.
“Ditën e dytë të vizitës e nisa me takime në Senatin e Shteteve të Bashkuara. Aty u prita nga Senatori Christopher Murphy dhe ekipi i tij politik. Biseduam për zhvillimet e fundit politike në Kosovë dhe rajon. Edhe në Senat shtrova kërkesën tonë për ngritjen e bashkëpunimit bilateral në mes të Kosovës dhe SHBA-ve nëpërmjet ‘Kartës për Partneritet Strategjik’”, njoftoi Abdixhiku në Facebook.
Tutje, i pari i LDK’së i ka kërkuar Senatit mbështetje të vazhdueshme për qytetarët e Kosovës.
“Në këtë drejtim, kërkesat tona për mbështetje ndaj popullit të Kosovës, institucioneve të Republikës, e aspirstave tona për anëtarësim në aleancën ushtarake të NATO-s, ishin krejt të natyrshme. Po ashtu, në takim u theksua nevoja e bashkëpunimit të ngushtë në fushën e politikës së jashtme, energjetikës e zhvillimit ekonomik”.
Lumir Abdixhiku u nis për në ShBA të dielën. /Reporteri.net/.
Postimi i plotë: