Ambasada Britanike në Kosovë, është përgjigjur pas reagimit të presidentit serb Aleksandar Vuçiq lidhur me takimin e ambasadorit britanik me Albin Kurtin në zyrën e këtij të fundit në parti, ku ishte i shfaqur vetëm flamuri shqiptar, por jo edhe ai i shtetit të Kosovës.
Ambasada Britanike reagoi në Twitter duke thënë se nuk janë ata që zgjedhin se si dikush vendos ta dekoroj ambientin e zyrës së tij.
“Një foto e fundit e Ambasadorit gjatë takimit me një nga liderët politikë në Kosovë ka tërhequr vëmendjen në rajon. Është detyrë e Ambasadës të punojë me aktorët kryesorë politikë në Kosovë. Ne nuk kemi zgjedhur se si bashkëbiseduesi ynë, në kapacitet partie, i rregullon ambientet e tij”, thuhet në reagimin e Ambasadës Britanike në Kosovë, shkruan reporteri.net.
Sot gjatë ditës Vuçiq kishte bërë një reagim në Twitter duke pyetur ambasadorin britanik nëse Albin Kurti dhe Vetëvendosje i kishin fituar zgjedhjet në Kosovë apo në Shqipëri.
“Pyetje për Ambasadorin. Cilat zgjedhje i ka fituar Kurti dhe partia e tij? Dhe cili flamur është pranë jush dhe Kurtit?”, kishte shkruar Vuçiq.
Dihet se Kurti gjatë gjithë angazhimit të tij politik për rreth 15 vite, kishte proklamuar bashkimin e Kosovës me Shqipërinë, dhe kishte kundërshtuar shtetin dhe simbolet e Kosovës.
Megjithatë, ai gjatë fushatës së fundit zgjedhore, kishte premtuar se do t’i pranojë simbolet e shtetit të Kosovës, duke përfshirë edhe Përfaqësuesen e saj në futboll, të cilën gjithashtu më herët e kishte kundërshtuar.
Së fundi edhe ishte parë në stadium, duke e përkrahur Përfaqësuesen e Kosovës, të cilën megjithatë e quajti vetëm ‘ekip’, por jo Përfaqësuese, e aq më pak Kombëtare. /reporteri.net