Kryeministri i vendit, Albin Kurti, është pyetur lidhje me pikëpamjet e ndryshme lidhur me të ashtuquajturin “vetë-menaxhim” të komunitetit serb në Kosovë, që përmendet në Nenin 7 të marrëveshjes së arritur në Ohër.

Kurti ka thënë se është e rëndësishme të bëhet e ditur se vetë-menaxhimi nuk nënkupton vetë-qeverisje, shkruan gazeta online Reporteri.net.

Ai deklaroi se kjo nuk është e njëjtë me Asociacionin, pasi sipas tij, në propozim flitet për vetë-menaxhim të komunitetit serb, e jo të komunave me shumicë serbe.

“Së pari duhet ta kuptoni që vetë-menaxhim nuk është vetë-administrim, nuk është vetë-qeverisje. Kjo është shumë e rëndësishme, është vetë-menaxhim. Dhe, këtu thotë, vetë-menaxhim i komunitetit serb. Nuk thotë i komunave me shumicë serbe”, deklaroi Kurti në RTK.

Kurti tha se në shërbim të komunitetit serb është edhe marrëveshja kornizë për mbrojtjen e pakicave kombëtare.

“Dhe, nga pikëpamja ime, e cila do të mund të konfirmohet nga cilido jurist serioz, që kur thua vetë-menaxhimi i komunitetit serb, në fakt e ke si instrument marrëveshjen kornizë për mbrojtjen e pakicave kombëtare, që është tejet e avancuar dhe pozitive. Edhe, në të, ne mund të gjejmë të gjitha zgjidhjet e nevojshme për ata serbë të cilët mund të mendonin se propozimi i planit të Ahtisaarit paska qenë i pamjaftueshëm”, tha ai. /Reporteri.net/.