Rezultatet e jashtëzakonshme që Përfaqësuesja e Kosovës ka arritur në futboll kanë bërë bujë kudo nëpër botë.

Pas pranimit të Kosovës në instancat më të larta të futbollit të FIFA-s dhe të UEFA-s, fillimisht ishte e vështirë për trajnerët të sillnin futbollistë, sidomos ata që luanin në Evropë.

Por kur kanë kaluar tre vjet të mbushura me rezultate pozitive, shumë futbollistë shpresojnë ta veshin fanellën e “Dardanëve”.

Jo vetëm te Përfaqësuesja A, por edhe te grup-moshat e reja të Kosovës ka shumë interesim nga futbollistët për të qenë pjesë e tyre.

Rast konkret është edhe 16-vjeçari Eron Ademi, i cili momentalisht jeton dhe luan futboll në shtetin e Belgjikës.

Ademi fillimisht e ka nisur karrierën në Ligën e Tretë të Belgjikës, derisa më pas është ftuar edhe nga grup-mosha U-15 të Belgjikës.

Futbollisti i talentuar nga Kosova më pas filloi të luajë te grup-mosha U-16 e skuadrës belge Lommel Sk, ku ishte i pafat për arsye se pësoi një lëndim serioz duke munguar 11 muaj.

Ademi momentalisht luan te skuadra Sporting Hasselt, ku kampionatin e ka përfunduar me 17 gola dhe 13 asistime në 16 ndeshje, derisa shumë shpejtë pritet që ai të ndërrojë ambient.

Përderisa Kosova ende nuk i ka dërguar ftesë, Ademi e ka marrë një vendim të madh për të ardhmen e tij në nivel ndërkombëtar, duke qenë se ai ka pasur edhe ftesa nga grupmoshat e reja të Kombëtares së Shqipërisë.

Siç bëjnë të ditur burimet e afërta të Zëri.info me futbollistin e talentuar nga Kosova, ai ka pranuar ftesën e Shqipërisë U-17, grupmoshë me të cilën tashmë është grumbulluar.

Në grumbullimin e tij të parë me grupmoshat e reja të Shqipërisë, Ademi la gjurmë të mëdha në ndeshjen e djeshme ku bëri dy asistime si dhe ishte ndër më të mirët në fushën e lojës.

Futbollisti i talentuar nga Shtimja ka qenë më parë i grumbulluar edhe me grupmoshat e reja të Belgjikës, por dëshira e tij më e madhe ka qenë ta përfaqësojë Kosovën, nga e cila ende nuk ka marrë ftesë, andaj ai ka zgjedhur Shqipërinë, vendim për të cilin është krenar.